Aizawl: Association for Voluntary Blood Donation (AVBD) huaihawta nimina Mizoram hmun hrang hranga Valentine’s Day puala thisen pek runpui neih-ah mi sang chuangin thisen an pe.
Valentine’s Day blood donation camp hi Aizawl-ah hmun thum leh district headquarters – Lunglei-ah hmun hnih, Serchhip, kolasib, Lawngtlai, Champhai leh Siaha-ah te hmun khatah theuh huaihawt a ni bawk a, thalai rual hmangaihna lantir nana thisen petute hi an vaiin mi 1,073 an ni.
Thisen pek runpui buatsaihna hmunpui ber, Aizawla Dawrpui Multipurpose Hall-a neih chu Sports minister Lalnghinglova Hmar chuan a hmanpui a, khawvel ram changkangin thisen pek an uar a, ram changkanga Mizoram a tel ve theihna chu thisen pek a nih thu a sawi a, damlote hman tur thisen pe theia awm chu malsawmna a nih thu leh thisen pek uar zel turin thalaite a sawm bawk.
V Day puala thisen pek runpuiah hian model leh zaithiam lar tak takten thisen pe apiang hnenah rose an pe zel a, zaithiamte an zai reng bawk.
AVBD, MSACS leh Blood Center, Civil Hospital, Aizawl tangkawp huaihawta thisen pek runpui hi kum 2010 atang khan buatsaih a lo ni tawh thin a, kumin hi a vawi 15-na a ni tawh a, kum 2010 leh 2023 inkarah Valentine’s Day pual hian thisen unit 9,853 pek a ni tawh a; vawiina pek nena belh khawm chuan he ni puala thisen pek hi unit 10,926 a tling a ni.
Thisen pe tura midangte fuihphurtu pawl, AVBD chuan thalaite chu damlo thisen mamawhte tana thisen pek uar chhunzawm zel tur leh kum khat chhungin tum hnih emaw, tum thum tal thisen pek theuh tum turin a sawm a, thisen pek chu mahni hriselna inchikna free medical check-up a nih pah thu tar langin, thisen pe ngam ngei nupui pasal atana thlan nachang hre thar theuh turin thalaite a chah a ni.