Aizawl: BJP Mizoram chuan Congress party chu mipui hmaa an dawt sawi thin bansan tura ngenin, dawt hmanga BJP beihnate chu dan anga hmalak zel an tum tawh thu an sawi.
Nimina an thuchhuahah Mizoram BJP chuan tun hnaiah MPCC Treasurer Dr Lalmalsawma Nghaka’n party mite intuaitharnaah Central BJP-in India pawisa note-ah Hindu Pathian Ram-a thlalak chuantir tum anga a sawi chu state khat party lian ve tak hruaituin a sawiah chuan a awm ang lo tih an sawiin dawt hmanga mipui zirtirna pek fo hi bansan tur leh thu dik hmanga politics khel ve turin an ngen.
Mizoramah hmasawnna tak tak, mi rethei thleng phak thlentir an duh ber tih tar langin BJP Mizoram chuan, “Intodelhna kawng Mizoram mipuiten kan zawh theih reng si, zawh hleithei lova kan tang rei ta lutuk hi beidawn thlak kan ti hle a ni. Chumia mawhphurtu pakhat Congress party-ten a dawt politics hmanga mipui an bum fo hi sim thuai tur leh tun hnuah chuan ti tawh lo turin kan ngen bawk,” an ti.
BJP Mizoram chuan dawt hmanga BJP te bei a, social media emaw, thusawinaa thehdarha hma la te chu dan anga hmalak zel an tum tawh thu leh, mipuite pawh thudik lo leh thuchianglo hmanga mipui ti chi ai thei leh dawt hmanga BJP te beihna rawngkai sawi tawh lo turin an ngen nghal bawk.