China chuan an ram atanga khawvela tlang sang ber, Mount Everest lawnna kawnga base camp chu tlang lawn phalna nei lote tan an khar a. Base camp-ah hian bawlhhlawh a tam avangin phalna nei thlap lote chu lawn an phal tawh rih lo a ni.
He khapna avang hian khualzinte chuan base camp awmna, metre 5200-a sang hnuaia mi, monastery chauh an thleng thei tawh dawn tihna a ni.
Mouth Everest-a lawn leh tlawhtu tam ber hi Nepal chhim lam atangin an kal deuh ber thin a; mahse, tun hnai kum eng emaw ti chhung hi China lam atanga lawn an pung nasa hle a. Chinese base camp hi Tibet ram chhunga awm niin car pawhin a thlen mai theih avangin a awlsam a, Nepalese camp erawh chu ke-in chawlhkar hnih vel zet kal a ngai thung a ni.
Khawvela tlang sang ber hi tlawhtu an tam avangin bawlhhlawh a tam hle a. Chinese Mountaineering Association chuan kum 2015 khan an base camp hi mi 40,000 chuangin an tlawh niin an sawi a, tun hnaiah a sang chak hle a. Nepal lama base camp hi kum 2016-17 chhungin mi 45,000 velin an tlawh ve thung niin Nepal Ministry of Forests & Soil Conservation chuan a sawi.
China-ah hian tlang lawn tur ni lo, khualzin satliahte tan Rongbuk monastery leh a chhehvel pawh tlawh khap nghal a ni a, he monastery hi tuipui atanga metre 5,000 vela sanga awm niin China state news agency Xinhua chuan a sawi a. Metre 8,848-a sang Mount Everest lawn tur tak tak tan erawh camp sang zawka kal zel erawh phal a ni.
January khan China chuan kum khata tlang lawn thei zat pawh tihniamin mi 300 chauh phalna an pe tawh bawk.
Tibetan thuneitute chuan favang lai atang khan tlanga bawlhhlawhte hi vawi thum ngawt thenfai rûnpui an buatsaih a, bawlhhlawh tonne 8 zet an then thu an sawi a, heng zingah hian mihring taksa bung hrang leh tlang lawn miten an hmanrua an kalsan a awm nual niin an sawi.
Kuminah pawh tlang then rûnpui hi neih leh an tum bawk.