Europe football thuneitu sang ber Uefa report-in a tarlan danin nikuma Manchester United squad kha football history-a squad man to ber a ni.
He mi chungchang zirchiangtu European Club Finance and Investment Landscape an tih chuan report an siamah 2023 financial year chhunga United player-te transfer fee belhkhawm chu euro vaibelchhe 1.42 (£1.21bn) a tling a, chu chuan a hmaa squad man to ber nihna hauhtu 2020 Real Madrid squad hlutna (£1.13bn) a khum ta a ni.
Nikuma Old Trafford club squad-a player man to zualte chu Antony (£82m), Harry Maguire (£80m), Jadon Sancho (£73m) leh Casemiro (£70m)-te an ni.
United total-ah hian kum 2023 nipui thawt laia club zawm fel chauh Rasmus Hojlund (£72m), Mason Mount (£55m) leh Andre Onana (£47m)-te belh tel a la ni lo mah mah!
Season liamta khan United hian Premier League-ah pathumna hauhin, manager thar Erik ten Hag hnuaia an season hmasaberah Champions League football erawh an khel pha.
Report-a a lan zel danin, transfer fee belhkhawma pound vaibelchhe khat tling zingah Manchester City, Chelsea leh Real Madrid an lang ve bawk.
Chelsea player-te hlut zawng belhkhawm hi June 2022 thleng kha niin, August 2023 thleng awh nipui transfer laia an sum hman belhkhawm (£850m) kha he tehnaah hian chhiar tel a ni lo.
Tunkar Nilaini khan British billionaire Sir Jim Ratcliffe-a’n United-a chanpual 25% lei a tumna chu Football Association lamin an pawmpui a, an intihfel hunah chuan Old Trafford club leina’na an sum hman belhkhawm hi pound vaibelchhe 1.03 vel a tling chho dawn a, Ratcliffe-a enkawl Ineos Group chuan United football an thunun tawh dawn a ni.