Aizawl: MNF party chuan ZPM kaihhruai Mizoram sorkar chu SEDP sum an pawhpen hmangin kuthnathawktute chu an hmunphiah leisak thuai turin an phut.
Nimina thuchhuah an siamah MNF chuan, MNF kaihhruai sorkar kalta khan kuthnathawktute tan tiin SEDP-ah Rs vbc. 150 a dah diam tawh chu, tun sorkar ZPM kaihhruai hian sorkarna an chan hnu lawkah pawtpengin, he sum hi thlai thar lei nan tiin Rs vbc. 110 dahin, Rs vbc 40 chu health care atan an dah nghal niin an sawi a. Thlai thar lei nana Rs vbc 110 dah a ni chung hian tun hnaiah kuthnathawktute thawh rah hralh chhuah tur a lo awm chho mek a, chung zingah chuan hmunphiah chu hralh tur tam tak awmin, a chingtuten an duh anga hralhna hre loin an hawihai mek niin an tar lang.
MNF chuan ZPM sorkar chu thlai thar lei nan Rs vbc 110 an dah chu hmang duh lovah puhin, hmunphiah lei tur hian RR Associate chu a inremsiam pui chu beisei ang an thlenpui loh hnuah, society te phungbawmah sawmin kawng kual zawk an dap leh mek niin an tar lang a. Tun dinhmunah hmunphiah chingtute chuan an hmunphiah hralhchhuah hun tawh lai a, hralhna hmu mumal lovin hrehawm ti takin hun an hmang mek chu pawi an tih thu tar langin, ZPM sorkar chu inthlan dawna mipui hmaa an inzawrh ang ngeiin, thlai thar lei nana an sum dah Rs vbc 110 hmangin hmunphiah lei nghal vat turin an phut thu an tar lang a ni.