MSL 9 khelh mekah team lian Zarkawt BCA chuan champion lai Khatla TBL an hneh hnuin Venghlui VR4 an hneh zui leh a, hnehna an chang zawn. Nilaini a inkhel dangah Bungkawn LB Associates in hnehna an chang bawk.
Champion tura rinkai Zarkawt BCA hian Venghlui VR4 lakah bul an tan tha lova, quarter hmasa berah point ngain hnufual zawkah an tan nghal. Bul tan tha lo mah se quarter hnihna atangin an insiamtha a, quarter hnihna atang quarter lina thlengin chungnung zawkah an tan ta zat zat a, awlsam takin hnehna an chang.
BCA hi quarter hnihnaah point 13 zetin an chungnung a, point 8 a hmahruai chungin chawlhlawk an hmang. Chawlhlawk hnu lamah an khel tha chhunzawm a, an khingpuite an thunun hneh ta viau. Quarter thumnaah point 20 zeta an chungnung hnuin, quarter linaah point 10 in an chungnung zui leh a. 109 – 71 a hnehna lian sualchhuak in, an khingpuite hi point 38 zetin an sawp
Point 38 zeta Venghlui VR4 an sawp tum hian Renthlei an langsar leh viau a, Lalnunpuia Renthlei in point 27 a thawhchhuah bakah Lalrina Renthlei chuan point 26 a thawkchhuak bawk. VR4 tana point thawkchhuak hnem ber Lalnunmawia Sailo chuan point 19 a thawkchhuak ve thung.
Nilaini a inkhel hnuhnung zawkah Bungkawn LB Associates leh Nursery Veng Sporting Club ten inkhel hmuhnawm an lantir a. Inkhel inhnehtawk takah Bungkawn LB A in point 8 in hnehna an chang.
Nursery SC hian Bungkawn LB A lakah an khel chhe lo viau naa quarter hnihnaah an chet that loh an tlawmpui. Quarter khatnaah point hnih chauha an hnufual laiin quarter hnihnaah point 8 ngawtin an hnufual thung. Quarter thumnaah point hnihin chungnung bawk mah se quarter linaah point 23 ve ve thawkchhuakin an inhnehtawk a. Bungkawn LB A in hnehna pawimawh tak an chang zui ta a ni.
He inkhelah hian Nusery tan Dequandre Duprii Dentmond a khel tha viau a, point 41 zet a thawkchhuak. Hei hi an team in point an thawhchhuah zawng zawng chanve aiin a tam zawk. Bungkawn LB A tan Gregory Lee Heckstall chu point thawkchhuak tam ber a ni a, point 27 a thawkchhuak. Anni hian team anga an khelh that rual an chhawr tangkai a, hei hi hnehna an chan phahna pawh a ni.
MSL 9 hi vawiin chawhnu dar 5;00 ah khelh chhunzawm a ni ang a. Bungkawn LB Associates leh Zarkawt BCA te an inkhel hmasa ang a. Zan dar 8:00 ah Nursery SC leh Chandmari Vikings an inkhel ve leh ang.