Aizawl: Nagar Van Yojana Scheme (City Forest) kalpuia hmalak mekna, Serchhip Sub-Headquarters YMA te enkawl, Serchhip daia Entlang Community Forest chu nimin khan Sub Hqrs YMA OB te leh Sub Hqrs hnuaia Media & Documentation Committee ten an tlawh a, Nagar Van Yojona Scheme hnuaia hmalakna kal mek te hna thawktute nen an enho.
Serchhip Sub-Headquarters YMA President Kawlthuama leh a thawhpuite hi thawktuten lo dawngsawngin, Nagar Van Yojana Sheme hnuaia hna an thawh dan hrang hrang te an lo hrilhfiahin an inkawm a ni.
An inkawmnaah he hna thawktu Rongura Hrahsel chuan hna an thawh dan hrang hrang sawiin, hna thawhna tur a sum awm zat chu Rs nuai 132 a nih thu leh, heta tang hian thing eng emaw zat phun belh tur a nih thu te, fur ruahtui luang ral tur khawlna tur hmun rukah siam tum anih thute, ruahtui dahkhawlna tur siam te, mihring ke a kalna tur track siam te, Interpretation Centre sak te bakah dil chunga lei dawh te chu an hna kalpui tur a nih thu a sawi a, Entlang Community Forest huam chun hung hna pawh zawhfel thuai a nih tur thu a sawi bawk.
Social Welfare & Tribal Affairs Dept scheme atanga SYMA community centre building sak mek (Vertical extention) pawh tlawh bawkin, SYMA hian 1st leh 2nd installment ah Rs. nuai 22.5 hmu tawhin, Rs nuai 98 chu 4th installment-a hmuh beisei a ni.