Ningani zinga NBA regular season khelhah Western Conference hma-hruaitu LA Clippers chu-an Golden State Warriors an hneh a, an hmahruaina an sawh nghet. Ningani zinga inkhel dangah Phoenix Suns in hnehna an chang bawk.
Western Conference hmahruaitu LA Clippers hian Western Conference table mawngphah luah mektu Golden State Warriors lakah bul an tan tha lo va, quarter khatnaah point 7 in hnufual zawk an ni nghal. Quarter hnihnaah an inhnehtawk zui viau a, point 29 ve ve thawkchhuak in, chak zawk an awm lo va, point 7 a hmahruai chungin Warriors in chawlhlawk an hmang.
Chawlhlawk hnu lamah LA Clippers an khel tha viau a, quarter linaah an khel tha leh zual. Quarter thumnaah point thumna an chungnun hram laiin, quarter hnuhnung berah point 16 ngawtin chungnung zawkah an tang a, hnehna an chang let ta daih. Warriors an lehthal theih nan LA Clippers tan James Harden chuan point 26 a thawkchhuak a, Paul George chuan point 24 a thawkchhuak bawk a, 130-125 a hnehna an chan theih nan an thawhhlawk dun hle. Warriors an lehthal vangin Clippers hi table chung berah an insawh nghet a. An tlawm leh tak vangin Golden State Warriors in table mawngphah an luah nghet ve thung.
Clippers laka an tlawm tum hian Golden State Warriors player pawimawh Stephen Curry chuan point 41 zet a thawkchhuak. Point 41 thawkchhuak tur hian three point vawi sarih ngawt a vawm lut. Curry hian NBA a khelh hnuhnung vawi li-ah three point vawi sarih a vawm lut tling vek a, NBA chanchinah hetiang ti thei awmchhun a ni. Clippers lakah chetha viau mah se Curry hian Warriors a chakpui zo chuang lo.
Ningani zinga inkhel dangah Phoenix Suns chuan an khingpui Detroit Pistons chu point 116-100 in an hneh. Suns tan hian Kevin Durant a khel tha a, point 25 a thawkchhuak. Inkhel tan atanga minute rukna lekah Suns player pawimawh Devin Booker hnawhchhuah a ni a. an player pawimawh Booker tel lovin Pistons lakah hnehna an chang tho thung.
Ningani zing hian LA Lakers chu an player pawimawh LeBron James tel lovin an inlan a, an khingpui Utah Jazz chu point 138-122 in an hneh. Jazz laka an chak tum hian Anthony Davis chuan Lakers tan point 37 a thawkchhuak a, ball sawhlet vawi 15 a dawng tling bawk. Hetihlai hian Rui Hachimura chuan NBA a khelh tawha point a thawhchhuah hmem ber tum tawngin, point 36 a thawkchhuak