February 14, Nilaini zan khan UEFA champions League last 16 khelh chhunzawm a ni a. French champion Paris St-Germain chuan an mikhual Real Sociedad chu si hnih faiin an hneh. PSg tan hian club dang pan thei dinhmuna ding reng Kylian Mbappe chuan goal khat a thun. Inkhel dangah Bayern Munich chu Lazio lakah an tlawm ve thung.
French Ligue 1 champion Paris St-Germain hian Parc des Princes-a an mikhual Real Sociedad lakah an khel chhe lem lo viau naa, goal erawh an thun mai thei bik lo. Chawlhlawk hmaa goal an thun theih loh hnuin chawlhlawk hnu lamah goal hnih an thun a, quarter-final an hnaih leh zual phah.
PSG manager Luis Enrique-a’n Ligue 1 an match hnuhnung bera a chawlh hahdamtir Kylian Mbappe chuan minute 58-naah hmahruaina goal a thun. Mbappe hian season tawp rualin PSG-a a contract a hmang zo dawn a, PSG chhuahsan tur angin sawi tlang than a ni. Mbappe hi Real Madrid zawm tur anga sawi ni mah se thutlukna a la siam fel lo niin tarlan a awm ve bawk.
Mbappe goal thun hnuin PSG an khel tha leh zual a, goal dang an thun belh leh thuai. Bradley Barcola chuan minute 70-naah an goal hnihna a thun a, an mualah 2-0 in an chak zui ta a ni.Nilaini zan Champions League last-16 first leg inkhel pakhat zawkah Italy rama zinchhuak Bayern Munich chu Societa Sportiva Lazio khelmualah sikhat faiin an tlawm a, goal lut awmchhun hi red card hrinchhuah penalty atanga irhchhuak a ni.
Second half minute 67-ah box chhunga awm Gustav Isaksen ke a tlawhsak avangin France international Dayot Upamecano chu straight red card hmangin hnawhchhuah a ni a, chu chuan penalty keng telin, Ciro Immobile chuan Lazio chakna goal awmchhun ni zui ta chhuihlutin, season kal laia a goal 10-na a ni nghal.
Away team mah ni se chak tura rinkai zawk Bundesliga giants Bayern khan tlarhma lamah star rual an tlar a, an zingah hian Germany a thlen hnua goal khung mar rei tawh tak Harry Kane pawh a tel ngei a, mahse, England captain pawh hian Bavarians tlawm tur a chhan zo ta bik lo a, ni nga chhunga Bayern tlawm vawihnihna niin, an manager Thomas Tuchel-a lakah ‘pressure’ a sang zual sauh.
Karliamta Inrinni mai pawh khan tualchhung league lamah Munich team hi Bundesliga title race-a an elpui lian Bayer Leverkusen khelmualah sithum faiin an tlawm a, league table-ah pahnihna la luah chhunzawm bawk mah se point nga ngawtin hmahruaitu Xabi Alonso team Leverkusen lakah an hniam tawh.
Bayern player-te khan Rome khaw inkhel boruak an ngam lo deuhte pawh a ni mai thei a, kum 2000 hnu lama club-in Champions League knockout match an khelh leh vawikhatnaah Lazio supporter rual thawm kha a pui hep hep ve em bawk a ni!