Rorel ZPM party-in nimin khan Baptist Centre, Falkland-ah hruaitu thar an thlang a, president atan tuna tang lai, Lalliansawta an thlang.
ZPM party General Assembly-ah office bearer post pathum – president, vice president leh treasurer turte an thlang a, elected OB thlanna hi floor atangin rawt chhuah an ni a, inthlanna hi Mizoram College Teachers’ Association (MCTA)-ten an kaihhruai a ni.
President post-ah hian Lalliansawta leh VL Zaithanzama te chu nominate an ni a, president tanglai chuan vote 2,528 hmuin thlan tlin a ni a, a khingpui, VL Zaithanzama hian vote 565-in a hneh lo a ni.
Vice president post atan hian mi pathum – W. Chhuanawma, C.Laltanpuia leh C. Lianlunga te chu floor atanga nominate niin, vote 1,735 hmutu, Tuichang MLA W. Chhuanawma chu vice president atan thlan tlin a ni.
Treasurer post atan hian mi panga – Lalchhuanthanga, SL Ngursailova, Saithuama Mangpa, C. Lalthanfela leh R. Lalchhuanmawia te chu nominate an ni a, vote 1,489 hmutu, Lalchhuanthanga, Aizawl South II MLA chu treasurer thar atan thlan tlin a ni a, ZPM OB tharte term hi 2024 atanga 2027, kum thum chhung tur a ni.
ZPM elected OB tharte hi National Council member te, Southern Headquarters Executive Committee member te, District office bearer te, block office bearer te, unit elected office bearer te, party village/ local council member te leh unit tin atangin mi pathum theuhten an thlang a ni.
Hruaitu thlan inkhawm hi chawhma dar 11-ah tan tura ruahman ni mah se vote thlak tura kal an thahnem avangin a hun takah tan theih a ni lo a, assembly an neihna hmun, Baptist Centre chhehvel, World Bank Road pawh a jam nasat phah hle a, ZPM thuchhuahin a tar lan danin assembly-a palai kal hi mi 4,500 bawr vel an ni.
He hunah hian Chief Minister Lalduhoma chuan thu sawiin, an hruaitu thlan chhuahte chu an pawl hruai tura Pathian hriak thihah an pawm tur a nih thu sawiin, hruaitu thar an thlan chhuahte chu tha taka party hruaitu turin a chah a ni.
Vawiin hian ZPM general headquarters-a executive member turte thlanna chu Dawrpui Multipurpose Centre-ah neih leh a ni dawn a, executive member hi mi 100 thlan chhuah tur niin, chuh tura hming pe lut hi mi 442 an awm a, executive member hi national council member ni laiten an thlang dawn a ni.