Aizawl: MPCC chuan an party pisa, Congress Bhawan-ah nimin khan ‘Friday Political Session’ an nei a. He hunah an president, Lalsawta chuan a hun lai mamawh mila party a inher danglam a ngai tih a sawi.
MPCC president chuan hun tharah an lut ta, hun hlui chu a liam tawh a. Congress party pawhin Mizo mipui, a bikin thalaite hip zawnga party kalphung an her danglam a ngai tih sawiin, “Sipaiin ram a runna chu i lo do let thei a; mahse, hunin a rawn ken ngaihdan erawh hi chu a do let theih loh a ni. A hun a lo thlen hi chuan a hunlai mamawh mila kan inher danglam a ngai a ni,” a ti.
Congress party hian Zoram mipui hi an tan hmathlir thui tak an nei a, chu kawng tha leh ram dinchhuahna chu zawhpui an tum a ni tih an hriattir dawn nia sawiin Lalsawta chuan, “Pathianin ram min pe, mipui min pe bawk. Pathian lam kan hawi ang a, kan duh hi Pathian duh nen a inmil thlap a nih chuan kan hlawhtling ngei ang,” tiin, an party kal zelna turah ram tan a tha em, mipui tana a tha em tih hian an zawt reng dawn a, an sorkar leh thuai dawn tih hi an ring tlat tih a sawi.
Lalsawta chuan Congress an kal zelnaah an kalsual ngai loh a, mipuite nena lungrual taka an kal zel theihna tur chu mahni lam indah thain, an rawngbawlsakte hi an ziaawm deuh em, harsatna eng nge an neih an chin fel theih ang tih an ngaihtuah ber chuan ram hi siam thatin a awm dawn a, chu chu an party kal dan tur a nih thu sawiin, “Kan party mipui pawhin politician chuam neiha mahni tanghma hai tum anga min ngaih lohna tur leh ram kan hmangaih tak zet tih an hriatna turin kan nun hian mipui hmaah tar lang rawh se,” a ti bawk.