Aizawl : MNF Adviser Denghmingthanga chuan ram leh hnam humhim tura MNF party in hnam movement a kalpui atanga Mizote hmasawnna kawng a kairual hi a la awm lo niin a sawi.
Nimina Mizo Hnam Run chhung inkhawmah MNF Adviser Denghmingthanga chuan thu sawiin, MNF chu ram leh hnam tana zalenna sual tura ruat an ni chu lawm turin party mite chahin, “Keini ang hi Zofate zingah a thlak thei tur an awm tawh lo,” a ti.
Denghmingthanga chuan, “Kan nula hmeltha ten vai an ngaisang tan a, Zofate hi boral mai turin ka awm a, kum 1961 ah kan hnam leh sakhua humhim turin MNF party hi Pathianin arawn hungchhuak ta a, kha hnam movement kha Pathianin a chhem alh zel,” a ti.
MNF movement hma khan vai ngaihsanna a awm nasa tawh hle nia sawiin Denghmingthanga chuan, “Kan hnam hming chu thil thing sawinan hman a ni hman tawh laia, Mizo nihna ti Mizo nawn leh turin zalenna movement a rawn awm ta, kha kha Zoramthar chu a ni ta,” tiin, zalenna leh hlimna hnam movement khan a keng tel a, hnam movement alo chhuah atanga Mizote hmasawnna kawng a kairual hi ala awm lo tih a sawi.
MNF Adviser chuan Mizo hnam leh sakhua humhim tura Pathianin a ruat vang hian ramriah pawh MNF chu inches khat pawhin a hnungtawlh duh lo tih sawiin, “Hnam Movement kengtu kan nih avangin BJP sorkar kan tawngkawlh phah a, hmasawnna ruahman leh hmachhawp zawng zawng a tlawlh phah bawk a. Raltlan tam tak, BJP sorkarin lo tuamhlawm an phalloh kha kan lo kuangkuah zela, kan tawng kawlh zual suah suah a ni,” tia sawiin, Pathianin hnam humhim tura a ruat an nih avangin, sakhaw hotute pawh a hneh tih a sawi.
MNF-in zu a duh lo tlat thin avanga lawm tur a nih thu sawiin MNF Adviser chuan, “Tun lai khawvelah hian hlauhthawnawm deuh a awm a, zu hi inthiam thei tak tak ni sela Bible hian a fakin ka ring. MNF sorkarin kan zuar lo ngam kha a Pathian thu em em,” tiin zuin thalai tam tak nun titawiin, hmeithai leh fahrah a tih tam thu a sawi.
Denghmingthanga chuan Synod zirchiannaah chuan mitthi 60% vel kha zu vanga hmeithai leh fahrahte an ni tih sawiin, “Zu zawrh loh aiin zu zawrh hnuah nau tih tlak a tam zawk. Phalna neia zu kan zawrh lai khan kan thi nasa lutuk, zu hi a chhiat avanga thihpui an tam phah lo, in tam avangin thihpui an tam zawk, zu chhe in avang ni lo, zu intam avangin thi an tam phah thin,” a ti.
MNF Adviser chuan zu zawrh phal avangin damdawi a hluar chuang lo tih sawiin, “Chu chu doctor thenkhatte research beihnaah pawh an hmuhchhuah a ni,” tiin, Bible tanchhan chungin MNF chuan zu hi an do zel dawn thu a sawi.