AZL: Sports & Youth Services Minister Lalnghinglova Hmar-in nimin khan Treasury Square-a MZP Pisapui a tlawh a, MZP General Headquarters hruaitute nen an inkawm.
Lalnghinglova Hmar chuan youth minister a nih angin MZP Pisapui a tlawh tih sawiin, “MZP chu zirlaite leh Mizo hnam tana pawl pawimawh leh tangkai tak a ni a. Mizo thalaite leh zirlaite zingah ruihhlo (damdawi) ngawlvei leh tithar an awm zel leh an pung chho zel chu a manganthlak,” tiin, a theih ang anga hmala turin MZP a sawm.
MZP pawhin Minister Lalnghinglova Hmar chu youth minister a nih avangin an intih neitu thu hrilhin, duhsakna an hlan nghal a. MZP Pisapui a tlawh avangin lawmthu an hrilh.
Mizo zirlaite leh ram leh hnam tana a department chan hnuaiah thawhpui an inhuam tih MZP chuan minister an hrilh a. MZP chuan sports department hnuaia sports infrastructure-te zirlaite tana hman tangkai theih tura ruahmanna siam turin an ngen a, a department hnuaia hnathawh hang hrangte theih ang angin an enpui dawn tih an hrilh bawk.
MoS leh MZP chuan hun remchang hmasa berah thawhho zel dan tur sawiho nise an ti bawk.