Mipui thinrimte chu police superintendent pisaah Kuki mi, head constable hrem (suspend) a ni tih thu a darh hnuah an pungkhawm a. Head constable hi ‘khaw venghimtu tura inpe ralthuam kengte’ nen thla an laho lai video social media-a a darh hnua suspend a ni.
Suspend-na tihchhuahah chuan SP Sivanand Surve chuan ‘thupek zawm tur police tih dan tur ni lova a chet vang’ niin tar lan a ni.
Kuki leh Meitei hian an tam zawkna district ve veah chuan ramri-ah hungna siamin ralthuam nen, ‘village defence volunteer’ tia insawiten an veng thin.
Thuneitute chuan head constable hi suspend a ni tih thu a darh veleh mipui thinrim inhawr khawmin lungin an tawng a, gate tichhiain an lut ta niin an sawi a. Police chuan mi 300-400 vel niin an sawi.
Churachandpur-a chuan inhal leh innawr hi zanlai thleng niin a sawi a, khuaah pawh venhim hna thawktu thahnem tak dah nghal an ni tih a sawi.
Churachandpur-a tribal pawl inzawm khawm, Indigenous Tribal Leaders’ Forum (ITLF) chuan head constable laka rang taka hmalak a nih laiin amah ang bawka che Meitei police officer lakah chuan engmah tih a ni ngai lo niin an sawi a. Police superintendent Surve chu an district atanga darkar 24 chhunga chhuak turin an phut tih an sawi.
ITLF hian Surve-a hi a mawhphurtu niin an puh a. “SP-in dik taka thil a tithei lo a nih chuan tribal hmuna a awm reng hi a tul lo. Police a suspend-na hi hlipin darkar 24 chhungin chhuak rawh se. A nih loh chuan a hnu zelah thil thlengah mawh a phur nghal ang,” an ti.
ITLF hi mipui pawl zinga sorkar laipuiin Manipur-a muanna a awm leh theih nana a dawr zinga mi a ni.
Churachandpur-a pisa suasamnaah hian ralthuam an ru em tih hriat a ni rih lo va. Thawhlehini khan mipuiin Imphal East-ah ralthuam an ru tawh a. Venhim hna thawktuten an kahnaah mi pakhat a thi.
Nikum May 3 atanga Manipur-a cheng hnam hnih, Meitei leh Kuki intihbuaina kal mek zelah hian mi 210 vel thi awm tawhin mi 50,000 chuan an baihvai mek.