National Tobacco Control Programme, National Health Mission hnuaiah nimin khan Mamit khawpui chhunga kohhran hrang hrang hruaitute leh Pastor te pualin I&PR Conference Hall, Mamit-ah zuk leh hmuam leh a kaihhnawih do tura inzirtirna workshop/ training buatsaih a ni.
Training-ah hian State Nodal Officer NTCP & Addl.Director (Dental) Directorate of Hospital Medical Education (DHME) H&FW Department Dr. H Lianthangpuia’n zuk leh hmuam thatlohzia inzirtirna chu kohhran hruaitute atanga bultan tha an tih thu te, Non-Communicable Disease (NCD) thlentu tam ber Vaihlo leh a kaihhnawih niin, Mizoram a thihna thlen tamtu ber a nih thin thu te, Zu leh Drugs ngawl vei zinga 90% te chuan an bul tanna chu Vaihlo – Meizial zuk atanga tan an nih thu te sawiin, he mi tihrehna tur hian Pathian thu atanga inzirtir uar deuh deuh turin Kohhran hruaitute chu thawhpuiah a sawm a. ‘Workshop/Training on Tobacco Control for Church Leader ‘ chu Mizoram disrict dangah te pawh neih kual zel tura ruahman a nih thu a sawi bawk.
State Consultant NTCP R. Lalremruata’n vaihlo hman chungchanga Mizoram dinhmunte sawiin, zuk leh hmuam do pawimawhna chhan hrang hrang leh chumi atan chuan enge tih theih, tih chungchangte bakah Vaihhlo avanga harsatnaa Mizoram dinhmun tlangpuite a sawi a. Vaihhlo -Zuk leh hmuam leh a kaihhnawih hlauhawmna hrang hrang sawiin, zawhna leh chhanna hun an hmang bawk a ni.