Mizoram State Resource Mobilisation Committee chu an Chairman Lalduhoma, Chief Minister hovin Inrinni khan an thukhawm a, an hmalak dan turte an sawi ho.
CM Meeting Room-ah thutkhawmah hian Chief Minister chuan, sorkar hmasaah khan sum thawk chhuak turin Resource Mobilisation Department anga din tumna awm mah se, sum leh pai renchem a ngaih avangin department thar din lam aiin a awmsa te pawhkhawm (amalgamate) hial hi an rilruah a awm zawk a. Committee anga kalpui theih nia a lan avangin an kalpui tak zawk thu a sawi.
Chief minister chuan sorkarin sum leh pai hnar tam zawk a neih theih nana hmalakna tur awm te an dap dawn tih sawiin, “Tunah pawh stamp duty lamah bul kan han tan a, India rama stamp duty la hniam ber te zinga mi ni chungin tlema tihsan hlek a ni,” a ti.
“Inrenchemna lam te, sorkar hnathawkte rel felna te, disinvestment lam te, outsourcing lam te, chhiah hmuhbelh theihna te leh a tul anga administrative reforms thlengin kan hma chho dawn,” tiin, chief minister chuan an kal chak theih nan sub-committee insiam te pawh a that hial a rin thu a sawi bawk.
Thutkhawm hi Vice Chairman Haukhuma Hauzel leh Member Secretary Ramchuana te’n an hmalak tawh dan an sawi fiah a, member ten hmalak theihna awm nia an ngaih thilte pawh an sawi ho bawk a ni.