Aizawl: NGO Coordination Committee hruaitute nena Mynamar leh India ramri hung (border fencing) leh ramri-a zalen tana inkalpawh theihna (free movement regime) hlih chungchanga an inkawmnaah Chief Minister Lalduhoma chuan eng emaw duh lohna lantira punkhawmna leh lim inhalsak awm lo hram se a duh tih a sawi.
Tun hnaia sorkar laipuiin India leh Myanmar ramri hung a tumna leh ramria zalen taka inkalpawh theihna a hlih duh lohna lantira punkhawm huaihawt an tum chungchangah chief minister hian Inrinni khan a pisa-ah NGOCC hruaitute a sawipui a. An inkawmnaah hian Mizoram sorkarin ramri hung chu tha an tih loh thu leh FMR pawh awm reng se an duh tih sawiin, “Tuna kan ramri hi British sorkarin ‘divide and rule policy’ hmanga min barhluih ramri a ni a. Unau min then hranga, kan hnam lian tak min pawt darh a, pawm theih a ni lo,” a ti.
Chief minister hian an hmathlir leh duhthusam chu hmun hrang hranga Zofate chu rorelna pakhat hnuaia awm a ni reng tih sawiin, tun hnaia Delhi-ah tum hnih a zinin union home minister leh minister pawimawh dangte pawh hemi chungchang sawipuiin Zofate dinhmun a hrilh niin a sawi a. Manipur hi an lo hung a nih pawhin an sawi phak a ni lo va, Mizoram erawh chu hung a rem loh thu a thlen nia sawiin, “Min lo dawnsawn dante ka ngaihtuahin thlamuang takin kan awm thei niah ka ngai,” a ti.
FMR chungchang bik hi chu ralthuam leh ruihhlo tawlhrukna a tam em avang hi ni mah zawktea a lan thu sawiin chief minister chuan, hemi thuah pawh hian border security infrastructure tihhmasawn hmasak a tul thute pawh a thlen thu a sawi.
Chief minister chuan sorkar leh NGO-te chu an thawh tlan zel a that thu a sawi a. Eng emaw duh lohna lantira punkhawmna leh thil tihah lim inhalsak hi chu awm lo hram se tha a tih thu leh Kristiante tihah chuan a mawi chiah lova a ngaih thu a sawi bawk.
NGOCC chairman, Central YMA president ni bawk, Lalhmachhuana pawhin sorkar tharah a tha zawnga thil inthlak an hmuh chhoh zel avangin chief minister chu lawmthu a hrilh a. NGO-ten ramri hung leh FMR hlih an duh lohna te tilang tura punkhawm huaihawt an tum dan te, chutiang lam ngaihtuaha an thawhpui Nagaland lama NGO-te pawhin hma an lak ve mek thu leh palai an tirh thu te, an thil phutte chu central sorkar leh Mizoram sorkar hnena ziaka an thlen tawh thute an sawi bawk.