Inrinni zana English Premier League khelhah hmahruaitu Liverpool chuan awlsam takin Brentford an hneh. Liverpool an chak laiin an mahni hnaih bertu Manchester City chuan Chelsea lakah tlawm an pumpelh hram thung. City an chak zawh loh vangin Reds in an hmahruaina an sawh nghet a, point hnihin hma an hruai zui zel.
- Liverpool 4-1 Brentford
Champion lai City aiin khelh khata an khelh tlem zawk vanga point hniha sang fal mek Liverpool chu Brentford hmachhawn turin Gtech Community Stadium-ah an lenglut a, mikhual an nihna hmunah goal li thunin an khel tha hle. Reds hian chawlhlawk hmain goal khat chauh thun mah se chawlhlawk hnu lamah goal thum ngawt an thun belh a, awlsam takin point thum an hmu.
Liverpool tan hian Darwin Nunez chuan minute 35-naah Jota siamsak atangin hmahruaina goal a thun a, he goal hmang hian si khat faia hmahruai chungin chawlhlawk an hmang.
Chawlhlawk hmain goal thun thei lawk lo mah se chawlhlawk hnu lamah Reds an khel tha viau a, goal an thun thuai. Minute 55-na lekah midfielder Alexis Mac Allister chuan Mohamed Salah siamsak atangin an goal hnihna a thun. Mac Allister goal thun hnu hian Mohamed Salah chuan minute 68-naah goal a thun zui ve leh a, an hmahruaina a tizau.
An mualah ngei si thum ngawta an hnufual hnuin Brentford in goal thun ngei tumin thapui an thawh chhunzawm a, minute 75-naah goal an thun ve ta nge nge. Club lian zawkten an hmuhtaih em em Ivan Toney chuan goal thunin an si phurh a sut then a. Toney hian amah hmutai em emtu Chelsea leh Arsenal chil a tiput tam leh zual. Toney goal thun hnu, hun tawp dawn hnaih minute 86-naah Gody Gakpo chuan Luis Diaz siamsak atangin Liverpool goal lina a thun a, an chakna a nem nghet. Gakpo goal thun hnu hian goal dang a luh belh tawh lova, Liverpool chuan 4-1 in hnehna an chang a, awlsam takin point thum an hmu.
Brenford laka point thum an hmuh hmangin Reds hian champion lai Manchester City chu point liin an kalsan. City hian Liverpool khelh zat khel kim pawh ni se an tan lehpelh theih an ni ta rih lo. Heti a nih tak vang hian Liverpool tan an champion leh champion loh chu an kuta innghat liau liau a ni a, mi dang ressult-ah inghah buai an ngai tawh rih lo.
- City himna Rodri
Inrinni zana inkhel dangah team lian pahnih Manchester City leh Chelsea te chu Etihad Stadium-ah an inhmachhawn a. Champion lai City hian hun tawp dawn hnaiha Rodri goal thun hmangin tlawm an pumpelh hram a, an mualah ngei point hnih an hloh.
Etihad Stadium-a lenglut Chelsea hi team dang daih ang maiin an khel tha a, champion lai City lakah chak phuin an inlan thei hial. Chelsea tan hian Raheem Sterling chuan minute 42-naah hmahruaina goal a thun. Sterling hian a team hlui laka a goal thun hi a lawm duh lo. Sterling hian season kal mekah a team hlui City hi vawi hnih a hmachhawn tawh a, goal a la thun ve ve. An player hlui Sterling goal thun vangin City hi hun rei tak chhung chu hnufual zawkah an tang. An si phurh an sut theih lawk loh hnu, hun tawp dawn hnaih minute 83-naah midfielder Rodri chuan Chelsea tlarhnungte thenfai zawh loh chu kawh zetin a pet goal a, an si phurh a sut. Rodri goal thun hnu hian goal dang a luh belh tawh lova, Chelsea in City lakah point khat hlu tak an hmu.
Season kal meka chetha lo tak Chelsea hian champion lai City an chai thei viau teh tlat. Stamford Bridge-a an inkhelh tumin 4-4 in an lo inhnehtawk tawh a. Etihad Stadium-ah an hmahruaina humhim zo bik lo mah se tlawm an pumpelh leh tho bawk. An mikhual Chelsea lakah an chak zawh loh vangin Manchester City hi pathumnaah an tlahniam a, hmahruaitu Liverpool nen an inkarah point li a tla zep ta bawk.