Mizorama hmunphiah hralh to berna ni thin, Vairengteah pawh tun lai hian hralhna rate chhiat lai ber a thleng mek.
The Zozam Times thudawn danin, a hralhna a nih avangin Vairengte hi Mizorama hmunphiah hralh to berna a ni thin a. Kuminah hian kum dang angin a leitu tur hnam dang sumdawngten an ngaihven loh avangin hralhna rate pawh a sang hlei thei lo.
Nikum tun ang hunah hmunphiah hring, kg khat Rs 50 te a nih laiin, tun lai hian kg khat Rs 25 a ni mek a. Kum danga kawngpui dung leh zau, kawng peng tina hmunphiah lei tura indawh pawh kuminah hian hmuh tur an awm mang lo a ni.
Hetianga hmunphiah hralhna rate a chhiat avangin kum hmasa lama leikhawm thin thenkhatte chuan hmunphiah leikhawm hi an tih loh phah nia thudawn a ni.
Hetihlai hian hmunphiah huan siamtu leh a leikhawmtu thenkhat chuan kum 2/1 danah hmunphiah hralhna rate tha leh tha lo hi a inchhawk thin niin an sawi a. Nikum lamah a rate a that avangin kumin hi a rate a chhiat an rinlawk thu an sawi a, nakkum lamah chuan hmunphiah rate pawh a that leh mai an beisei thu an sawi.
Hmunphiah hi demand a awm leh awm lohah te, khaw that leh that lohah te, a hralhna rate hi a innghat thui hle nia sawi a ni a. Ni tin a rate a danglam thin a, phai lama demand azirin a leitu an tam bakah a rate pawh kum tin a inang lo nasa hle thin nia sawi a ni bawk.
Mizoramah chuan Kolasib leh Mamit district hi a ram leilung leh a sik leh sa avangin hmunphiah hian a ngeih hle a. Chuvangin, heng atanga tharchhuahte hi a quality a thain India ram hmun dang atang pawhin leikhawm turin kum tin hnam dang sumdawngten an ngaihven thin a. A bik takin Vairengte leh a chhehvelah chuan ni tin hmunphiah an keh thar apiang chu a hringin, hnam dang sumdawngte hnenah an hralh leh thin a, hmun khatah lei khawma, phoro hnua hralh leh an awm bawk.