Madhya Pradesh-a buaina a awm mek laiin Jharkhand-a Congress MLA thenkhat chu Champai Soren-a kaihhruai JMM sorkara an party mi MLA palite minister-a dah an nih avangin an lawm lo mek.
MLA 12-te hian February 23 atanga assembly session neih tur chu an boycott a, minister-a lak luh tharte hi thlak an nih loh hma loh chuan Jaipur-a awm an tum.
An zinga pariat chuan Inrinni zan khan Delhi an thleng a, an party hotute hnenah an Soren-a sorkara minister thar MLA-te an duh loh thu hi an thlen.
JMM kaihhruai tangrual sorkarah hian member 81 awmna assembly-ah JMM-in 29, Congress-in 17 leh RJD-in MLA pakhat an nei a, a vaiin 47 an ni.
Congress-in minister atana a tih mi pali – Alamgir Alam, Rameshwar Oraon, Banna Gupta leh Badal Patralekh te ruat an nih dawn khan Ranchi Circuit House-a sawiho a nih lai pawhin inpawhna a nasa hle a, Zirtawpni khan an MLA-pui thenkhatin anmahni lak luh inkhawm an boycott karah lak luh an ni.
MLA hel mekte hian party hotu lawkte atangin chhanna hmuh thuai an inbeisei a, Rahul Gandhi-a’n ‘mi pakhatin chanvo pakhat’ tih chu a taka kalpui an duh thu an sawi.
An zinga mi, Bermo bialtu MLA Kumar Jaimangal chuan an state leh central-a an party hotute hnen atanga eng thu mah an hmu lo a nih chuan Rajasthan khawpui an pan dawn tih a sawi a, Jharkhand assembly session pawh boycott an tum tih a sawi bawk.