Aizawl : Mizoram larsap Dr Hari Babu Kambhampati leh Rajya Sabha member K Vanlalvena te’n Mizoram tana thil pawimawh hrang hrang an sawi dun.
Inrinni zing khan Dr Hari Babu Kambhampati leh K. Vanlalvena te hi Raj Bhavan-ah inkawmin, Myanmar ram buainain a nghawng harsatna chi hrang hrangte, Act East Policy hmanga sorkar laipui, Ministry of External Affairs-in a thawh mek, Mizoram chhim lam atanga Bay of Bengal tuifinriat kam khua Sittwe thleng tur KMMTTP Road project hna thawh mekin harsatna a tawh sutkian dan tur te, Mynamar kal tlanga Mizoram leh Thailand ram thlunzawm tur Zokhawthar atanga Maesot (Thailand) kawngpui siam mekin harsatna a tawh mekte sutkian a nih theih dan turte bakah, Indo-Bangladesh border trade centre Tlabung-Kawrpuichhuah a din tur hna muang lutuk chungchangte an sawi dun a. A tul dan anga sorkar laipui External Affairs leh Commerce and Industry-ah thlen turin hmachhawpah an dah.
Larsap chuan Bairabi atanga Sairang rel kawng siam mek chu lei dawh lai a chim avanga zawh hun tur a khawtlai phah pawi a tih thu te, KMMTTP road hna tihkhawtlai a ni chu pawi a tih thu te sawiin, he’ng kawng pahnihte hi zawh a nih hunah chuan Mizoram mipuiten ei leh barah nasa takin hma an sawn phah a beisei thu a sawi a ni.
Larsap leh Rajya Sabha MP te hian Myanmar border fencing siam tumna leh chumi kaihhnawih thil leh a nghawng theih te pawh an sawi dun bawk.