Aizawl: Lungsen khuaa Mizoram Baptist Kohhran Hmeichhe Pawl (MBKHP) Inkhawmpui chu tukina tawngtai inkhawm neih zawhah a tiak ang.
MBKHP Inkhawmpui vawi 51-na chu LGSA Playground, Lungsenah February 15, 2024 zan atanga tanin, thupui atan ‘Tho la i Pathian ko rawh (Jona 1:6)’ tih hman niin, Rev. K.Lalnunsanga, Aizawl Central bialtu pastor chu speaker a ni.
Zirtawpni khan rorel inkhawm neih niin MBKHP President P.C. Lalvohbiki’n a kaihruai.
Rorel palaite hian Baptist Church of Mizoram (BCM)-in old age home a din theih nan MBKHP-in hma lak te, MBKHP Inkhawmpui dawltu tanpuina member pakhatah Rs 20 khawn thin chu Rs 50-ah tihsan te, Zemabawk Cancer Hospital-ah poor patient fund pek te, Christian Hospital, Serkawnah CT scan leina tur unit tin atanga thawhchhuahte leh fa neih tam inzirtir an pawm a ni.
Inrinni zan, Pathianni zing leh zanah te inkhawm neih niin Pathianni chawhnuah Lalpa Zanriah sacrament an kilho a. Rev. R. Lalnunzira, AGS-Service-in Sacrament a buatsaih a ni.
Sacrament inkhawm tih loh chu inkhawm apiangin speaker thuchah bakah MBKHP secretary report leh thupuan te, kohhran hrang hrang aiawh hnen atanga chibai bukna te, Bial BKHP zaipawl hla remte ngaihthlak thin a ni.
Inkhawmpuia tar lan a nih danin MBKHP hian kum 2023-24 chhungin buhfaitham atangin Rs 9,92,50,370 an thawh chhuak a ni.
Inkhawmpuiah hian Mizoram leh India ram pawn USA atangin palai pakhat, Indian Baptist Woman Union atangin palai pathum bakah Mizoram chhung kohhran hrang hrang panga atangin palai pahnih theuh ten an hmanpui bawk.
Mizoram BKHP te hi Pastor Bial 92 awmin, unit 462 an awm a, member 34,304 an awm mek a ni.