Labour Party hruaitu, Jeremy Corbyn-an Britain-in European Union a chhuahsan tur chungchang a sawinaah Judate hmuhsitna lam tawngkam a hman an duh loh avangin an party MP pasarih chuan an party an chhuahsan phah.
Labour Party chhuahsantute hi Chuka Umunna, Luciana Berger, Chris Leslie, Angela Smith, Mike Gapes, Gavin Shuker leh Ann Coffey te an ni a. Berger chuan Labour chu Judate duh lohna (anti-Semitic) pawla a tel tâk thu leh awm reng a zahthlak thu a sawi.
Corbyn chuan heng MP-te hian an policy anga kal zel tura thawhho an thei ta lo niin a sawi ve bawk.
Labour Party chhuahsantu MP -te hian political party thar din emaw, a dang zawm tumna emaw an nei rih lo va, Parliament-ah pawh Independent group-ah an thu ve mai dawn a. Umunna chuan Labour MP dangte leh party dang MP-te pawh tihhmuhtu ni turin ke an pen a, politics thar din turin an cho phur niin a sawi a. “Kan politics hi a kehchhe ta a, hetiang tur a ni lo va, inthlak a ngai,” tiin London lailia thiltihna hmuna a telnaah a sawi.
“Labour Party atangin tukin (nimin tuk) khan kan bâng a. A harsa a, a hrehawm a; mahse, loh theih loh a ni si a. Kan ram kil hrang hrang aiawh kan ni a, kan chawr chhuahna a inang lo va, kan chhuah hun pawh a inang lo va; mahse, hlutna inang theuh kan nei a. Vawiin atang chuan Parliament-ah pawh independent group-ah kan thu ang,” tiin MP Luciana Berger chuan a sawi.
“Miin Labour hi chi leh chi thliar thin, anti-Semitic party tia an sawi tawh tur hi hrehawm ka ti tak zet. Corbyn-an Labour a kaihhruai danah hian Brexit hi a duh lo tak zet tih a lang chiang bawk,” tiin Mike Gapes-a’n a sawi ve bawk.