Firfiakten Jammu & Kashmir, Pulwama district-a bus an beihna kal zelah nimin khan Assam-ah mi pakhat, Pakistan tan zawnga Facebook-a thu ziak thehdarhtu chu mipuiin an sawisa a, police-in an man zui bawk.
Khairul Islam hi Assam chuanchung lam, Tinsukia district-a Ledo Junior College-a 2nd year zirlai a ni a. Facebook-ah hian Pulwama-a sipaite beih chungchangah, ‘Pakistan Zindabad’ tih thu a tar lang a. He thil duh lohna avang hian mipuiin an sawisa a, mipui hian Ledo police kutah an hlan zui a, an la kawl mek a, chhui zui mek a ni bawk.
Khairul hma hian Assam-ah hian Pulwama-a thil thleng chungchang social media-a thehdarha man leh hrem an awm nuala. AIUDF MLA Aminul Islam pawh Islam tan zawnga hemi chungchangah hian thil a sawi avangin a lakah FIR thehluh a ni.
A hma pawhin Guwahati-a Icon College-a assistant professor pawh social media-a thu a post avangin a hna atangin chawlh lailawktir (suspend) a ni tawh bawk.
India leh Pakistan inkar hi kum 1947-a an ram an inthen atangin that lai a nei ngai meuh tawh lo va, Kashmir inchuh avang pawhin vawi hnih lai an indo tawh a. Ram inchuhna avang bakah hian sakhaw vawnah an inan loh em avangin hetiang kaihhnawiha thu inhmuh loh hi an ngah hle tawh bawk.