Sum tamna Saudi Pro League chu kum kal ta khan footballer langsar tak takin an pan a, a boruak a lian hluai. Kum kal ta maiah an boruak lian hluai mah se tlakhniam lam an pan a, entu a tlem sawt hle.
Zirtawp zan khan Al Wehda leh Al Tai te chu mi 38,000 lenna khelmual King Abdulaziz Sports City Stadium-ah an inhmachhawn a, he inkhel hi a hmunah mi 800 chauhin an en. He inkhelah hian Manchester United leh Watford striker hlui Odion Igahlo chu Al Wehda tan a inlan a, ani meuh pawh hian entu a hip lem lo hle.
Inrinni zan khan mipui 25000 lenna khelmualah Al-Hazm Club Stadium-ah Al Hazem leh Al Fayha te an inkhel zui ve leh a, he inkhel hi a hmunah mi 355 chauhin an en bawk. Inrinni zana inkhel entu zat hi khelmuala mipui leng zat atanga za zela chhutin 2% chauh ni. Heti a nih chuan Saudi Pro-League boruak arh hluai kha rin aia hmaa dai in, a zuih rang viau dawn niin a ngaih theih.
Inkhel thenkhat entu an tlem em em lai hian Cristiano Ronaldo boruak erawh a la lian chhunzawm reng. Ronaldo khelhna Al-Nassr chuan inrinni zan vek khan Al Awal Park-ah Al Fateh an mikhual. Ronaldo goal khat thunna inkhel hi a hmunah mi 15,803 in an en. Al Awal Park hi mipui 25000 lenna a ni a. Al-Nassr leh Al Fateh te inkhel hi ‘entu an tam kher mai’ tia sawi hluai tur erawh a ni hran chuang lo.