Aizawl : Lunglei Bawrhsap Ramdinliani’n, tuilian vanga harsatna tuartute chhawmdawl kawnga, a ṭula hman tur Tlabunga Safe House sak zawh tawh chu Inrinni khan tlawhin, a enfiah.
Tlabunga Safe House hi DoNER Ministry hnuaia One Time Special Assistance sum Rs. nuai Rs.114 senga sak a nih thu sawrkar thuchhuah chuan a tarlang a. A enkawltu tur department kuta hlan hmaa enfiah ngai te endiktu Lunglei Bawrhsap chuan GAD-in a enkawl zui huna mamawh tur thil ṭûl dang te a rang lama ngaihtuah dan kawng dap turin a satute chu a ngen nghal a ni.
Tlabung Safe House hi fur tuilen laia insasengna tur hmun remchang neilote inthiarluh lailawkna tura ruahman a ni a, tuiin a chim phaklohna tur hmun Tlabung Zawlpui venga Thangliana mual sir hmun remchang laiah chhawng khata sak a ni.
NABARD RIDF sum hmanga Tlabunga Supply Chhêk In sakna tur hmun pawh Lunglei Bawrhsap chuan a tlawh nghal a. Supply Kudam awm sa bak, a dang sak belh a nih chuan ṭumkhatah buhfai tam lehzual chhêk khâwl theih a nih tawh dawn avangin, Tlabung bakah a chhehvel khaw hrang hrang ten an chhawr ṭangkai dawn hle tih a sawi.
Lunglei Bawrhsap hi Lunglei Additional DC Donny Lalruatsanga, DCSO leh SDO (Sadar) ni bawk Lalhlimpuii Ralte leh SDC Malsawmhriatzuali ten an tawiawm a, Tlabung SDO (C) H. Zonunmawia’n a lo dawngsawng a ni.