Thawhtan zing khan NBA a game ngaihhlut hlawh tak, Basketball thiam bikte inlanna All-Star Game khelh a ni a, Eastern Conference tan point 39 zet thawkchhuak Damian Lillar chu All-Star Most Valuable Player (MVP) ah thlan a ni.
NBA All-Star Games 2024-ah hian Eastern Conference an khel tha viau a, quarter tinah Western Conference aiin point an hmu sang zawk vek. Quarter khatnaah point 53 lai an thawkchhuak a, point 6 in chungnung zawkah an tang nghal. Quarter hnihnaah point 9 in an chungnung zui leh a, point 13 a hmahruai chungin chawlhlawk an hmang.
Chawlhlawk hnu lamah Eastern Conference an khel tha chhunzawm a, quarter thumnaah point 9 in an chungnung a, an khingpuite nen an inkar an tizau leh zual. Quarter hnuhnung berah Western Conference an khel tha hret a, point 50 lai thawkchhuak mah se point khatin hnufual zawk an ni tho thung. Eastern Conference hian point 211-186 in hnehna an chang a. An khingpuite hi point 25 in an hneh.
Point 25 ngawta Western Conference an hneh theih nan Eastern Conference tan Milwaukee Bucks guard Damiam Lillard a khel tha viau a, point 39 zet a thawkchhuak. Point 39 thawkchhuak tur hian three point vawi 11 zet a vawm lut bawk. A chet that em vang hian MVP-ah thlan a ni a, kum 33 mi hian Kobe Bryant MVP Trophy a dawng. Eastern Conference tan hian Boston Celtics forward Jaylen Brown chuan point 36 a thawkchhuak a, Indiana Pacers guard Tyrese Haliburton chuan point 32 a thawkchhuak bawk. Western Conference tana point thawkchhuak hnem ber chu Minnesota Timberwolves player pawimawh Karl-Anthony Towns a ni a, ani hian point 50 zet a thawkchhuak.
NBA All-Star Games 2024-ah hian record thar hmuh tur a awm. Team hnihte point thawhchhuah zawng zawng hi point 397 zet a ni a, hei hi NBA All-Star game khelh tawh zawng zawnga point thawhchhuah tam ber niin, kum 2017 a record lo awm tawh point 374 chu point 23 zetin an khum. Eastern Conference in point 211 zet an thawkchhuak hi NBA All-Star ah team khatin point an thawhchhuah tam ber a ni a. Western Conference in kum 2016-a record an siam 196 chu point 15 in an khum. Hei bakah hian chawlhlawk hmaa team hnihte point thawhchhuah point 193 hi NBA All-Star-ah chawlhlawk hmaa point thawhchhuah tam ber record thar a ni cheu bawk.
Thawhtan zinga NBA All-Star-ah hian player ropui LeBron James chu All-Star-ah a vawi 20 nan a inlan a, NBA All-Star vawi 20 khel thei hmasa ber niin, mimal record duhawm tak a siam. Record a siam tum hian LeBron James hian hliam a tuar a, minute 14 chiah a khel. Minute 14 a khelh chhung hian point riat a thawkchhuak hman.