Aizawl: February 17, 2024-a Chief Minister Lalduhoma leh NGO Coordination Committee hruaitute an inkawm tum a chief minister-in Myanmar nena ramri hung chungchang a sawinaah eng emaw duh lohna lantira punkhawm leh lim inhalsak chu awm lo hram se tha a tih thu a sawi chu Congress party chuan pawi an ti a, dawihzepthlak an tih thu thuchhuah an siamah an tar lang.
An thuchhuahah Congress party chuan, “Mizo mipuiten Myanmar nena kan ramri hung kan duh lo tih hre reng chunga Chief Minster Pu Lalduhoma’n ramri hung kan duh lohna lan chhuah tirna tur punkhawm leh lim hal lo tura NGO Coordination Committee te a ngen ta mai hi Congress party chuan Mizoramin chief minister dawihzep kan nei niah a ngai,” an ti.
Congress party chuan, “Congress sorkar laiin Manipur-ah Anti Tribal Bill avangin khatih laia CM Pu Lal Thanhawla chuan Manipura Zofate tan nasa taka an thlavang hauhin central sorkar khak pawh a hlawh phah hial a ni,” tiin, Myanmar-a cheng Mizote nena inunauna tichhe thei tura central sorkarin Myanmar nena ramri a hung lui a nih chuan na takin a dodal dawn tih an tar lang.
CM Lalduhoma’n central BJP sorkar hlaua ramri hung duh lohna punkhawm leh lim hal a hlau ta mai chu pawi an tih thu tar langin, tlang hrang hranga Zofate tan Lalduhoma hi innghahna tlak a nih lohzia tar langtu-ah an ngaih thu an tar lang bawk.