Pathianni zana English Premier League khelah Manchester United chuan harsa takin Luton Town an hneh. Luton Town an hnehna goal hnih thuntu Rasmus Højlund chuan EPL-a a zawna goal ruk thun zawn thei naupang ber record thar a siam. Pathianni zana inkhel dangah Brighton & Hove Albion chuan Sheffield United an sawp.
- Højlund a vul
Kenilworth Road a lenglut Manchester United hian mualneitu Luton Town lakah bul an tan tha hle. EPL-ah goal thun zawn a, huangtau thar tak Rasmus Højlund chuan Luton Town tlarhnungte chetsual a hrem. Amari ball pet chhe zet a khalh tlang a, si nghak Thomas Kaminski a bum kual leh te te a, inkhel tan atanga second 37-na lekah hmahruaina goal a thun nghal.
Hma takah goal an thun vangin United an khel tha zui viau a, goal an thun belh leh thuai. Minute 7-na lekah corner atanga ball kal chu rawlthar chetha chho tak Garnacho chuan kawh zetin a pet lut. Argentina rawlthar ball pet luh hi goal hmahruai thuntu Højlund chuan a awmin a lo dang pial zeuh a, si nghak Kaminski rin loh lamah lum lutin an goal hnihna a thun.
Nipui bazar liam taah United in £72m senga an lak luh Rasmus Højlund hian kum 21 leka upa ni mah se forward tha a nihzia khawvela tualchhung league harsa ber English Premier League-ah a lan chiantir deuh deuh zel a, goal a thun ta mawlh mawlh. Denmark forward Højlund hian EPL a khelh hnuhnung vawi rukah goa a thun vek a. EPL-ah khelh ruk chhung goal thun zawn thei naupang ber record thar a siam a. Joe Willock record siam a khum.
Minute 7 chhung lekin goal hnih chhuah hman mah se Luton Town an buai rei lova, goal an thun ve thuai. Minute 14-naah Carlton Morris chuan goal thunin an si phurh a sut then. Morris goal thun hmangin phurna thar an nei a, an mualah point hlawhchhuah tum viau mah se an hlawh tling zo lova, hun tawp thlengin goal dang an thun belh thei tawh lo. United pawhin goal an thun belh thei tawh bik lova, 2-1 a hnehna chang hramin point thum hlu tak an hmu.
- Brighton an chak nuamsa
Pathianni zana inkhel dangah Brighton chuan Bramall Lane-a an khingpui Sheffield United chu 5-0 in an sawp. Brighton an mikhual tum hian table mawngphaha Sheffield United an vanduai a, kim lo zawkah an tang thuai. Inkhel tan atanga minute 13-na lekah Sheffield United 0-5 Brighton hnawhchhuah a ni. Kim lo zawk an nih hnuin an talbuai zui viau a, goal nga ngawt an chhuah phah. Brighton tan hian Simon Adingra-a’n goal hnih a thun a. Facundo Buonanotte leh Danny Welbeck ten goal khat ve ve an thun bakah Jack Robinson chuan an lamah a ti-goal bawk. Sheffield vanduai a kaltluang a ni ber mai.