Mizoram Football Association chu All India Football Federation (AIFF) in AIFF Grassroots Awards 2023-24 a buatsaihah Best State Football Association chawimawina a hlan a, chawimawina ngaihhluthlawh a dawng.
AIFF Secretary General chuan Mizoram FA hnenah he Award hi rawn thawnin “India rama Grassroots Football in hma a sawn theihna tura chawl lova in thawhna hian in state mai bakah, rampum huapin nghawng duhawm tak a nei dawn a ni,” a ti a. “Mizoram Football Association hmasawnna chu Indian Football hmasawnna tichaktu pawimawh tak a ni” a ti bawk.
All India Football Federation in a bulthut atanga football hmasawnna atana hma a lakna kal mekah hian Mizoram FA chu ralbang mai lova, theihtawp chhuah chhunzawm zel turin AIFF chuan a rawn ngen bawk.
Hetihlai hian Mizoram FA in Reliance Foundation nena an kalpui mek Naupang League chu Grassroots Awards ah hian Best Social Initiative nominee zingah a telh bawk a ni.
Kum 2013 khan Mizoram Football Association hi AIFF chuan Grassroots Development a ti tha ber chawimawina (award) a lo hlan tawh bawk..
Mizoram Football Association hian Tata Trusts thawhpuiin Zoram dung leh vanga Centre 60 ah Grassroots Football a kalpui a, Education Department hnuaia Samagra Shiksa thawhpuiin Centre 13 ah naupang football zirtirna a kalpui bakah Aizawl ah naupang football zirna Centre 1 a kalpui bawk.
Mizoram Football Association hian Reliance Foundation Youth Sports (RFYS) nen District pali – Aizawl, Lunglei, Champhai leh Kolasib ah Inter School/College inelna U13, U15, U17, U19 & U21 tan a buatsaih a. Reliance Foundation Young Champs (RFYC) nena thawk dunin Naupang League a kalpui bawk a ni.
Reliance Foundation Development League (RFDL) nena thawk dunin Under 21 tan inelna a kalpui mek bawk a. He inelnaah hian U23 mi panga tel theih niin, Mizoram atangin team 2 te National Qualifiers ah an tling chho ang a, chuta ti tha te chuan English Premier League Academy te telna Next Gen Cup an khel thei dawn a ni. RFDL hnuaiah hian Aizawl ah Team 5 te an inel mek a ni. MFA In chawimawina a dawng hi football tan bung thar pakhat a ni.