February ni 14-17, 2024 chhunga Dronacharya Indoor Hall, DGAR Assam Rifles, Laitkor, Shillong, Megalaya-a khelh zawh tak 1st Khelo India Women’s Taekwondo League 1st Phase-ah Mizoram team-in gold medal pakhat leh silver medal pahnih an hlawhchhuak.
He tournament-ah hian Mizo taekwondo khel thiam pakua chhuak zingah Vanlalthlamuanpuii chuan Cadet under 59 kg huangah gold medal a la a; Muanpuii hian a match hmasaberah 8-5, 3-2-a Assam player hnehin, semi-final match-ah Manipur aiah chu 2-0, 7-3-in a hneh leh a; final-ah Manipur aiawh laka 4-0, 4-2 hnehna changin a champion zui ta a ni.
Junior under 49 kg huanga inlan R. Lalbiaknuami chu silver medal awrhtu pakhat zawk niin, Mami hian a bultanna inkhelah tualchhung (Meghalaya) player chu 6-0, 7-0-in a hneh phawt a, quarter-final lamah 7-0, 9-2-a Bihar aiawh hneh lehin, semi-final match-ah pawh 6-2, 7-1-in Assam player a paltlang leh mai a, final-ah erawh 2-1, 4-6, 3-5-in SAI NCOE, Guwahati hminga khel a ngam ta lo a ni.
Silver medalist dang PC Lalduhawmi chuan Junior under 46 kg category-ah bultanna hahdam a chang a, a first match turah free draw (bye) a hmu hlauh a, quater-final atanga bul tanin, Assam tleirawl lakah 8-1, 9-0 hnehna a sualchhuak a, semi-final lamah pawh tualchhung player lakah 16-11, 12-5 hnehna lawm zui lehin, gold medal match-ah Assam aiawh nen an intum a, he tah erawh 2-9, 0-8-in a vanduai ta a ni.
Mizoram tana medal latu pathumte hian March ni 9-11, 2024 chhungin Cuttack-ah National Inter-Phase an hmachhawn zui leh nghal dawn a ni.