Papua New Guinea-a hmun kilkhawr lai, tribal khawsate inkara buaina a chhuah fona thin, Highlands an tih laiah mi thahnem tak thah an ni tih thuneituten an sawi.
An ram police thupuangtu chuan kartawpah khan Enga province-ah inlambunna thlengin hetah hian kah hlum an ni tih BBC hnenah a sawi.
Highlands huam chin hi hun rei tak ata tawh tharum thawhna a thlen tamna a ni a, tun tuma mi erawh kum tam tak hnua thi an tam ber tum nia ngaih a ni.
Heng lai bialah hian dan lova ralthuam lak luh a tam avangin buaina chhuakah thi an tam telh telh a, buaina chhuak pakhat hian a dang a kan kai phah zel bawk.
Thuneitute hian a tirah chuan thi hi mi 64 vel niin an puang phawt a; mahse, an lo chhiar sual deuh avangin mi 26 zawk an nih thu an sawi leh.
Police chuan an khawpui, Port Moresby atanga hmarthlang lam km 600 vela hla, Wabag khaw bulah ruang an la khawm tan mek.
“Tun hi Enga-a mi thah an tam ber tum niin ka hria a, Highlands pumah pawh a tam ber tum a ni hial mai thei bawk,” tiin Royal Papua New Guinea Constabulary Acting Supt George Kakas chuan Australian Broadcasting Corporation (ABC) hnenah a sawi.
“Min barakhaih tak zet a, kan rilru pawh a na a, dawnsawn thiam a har em em a ni,” a ti.
Police hian video leh thlalak thenkhat pawh an dawng tawh a, chanchinbute chuan ruangte hi truck-ah hlan an ni hlawm niin an tar lang bawk.
Enga-ah hian nikum July khan tribal-te inkarah ram leh hausakna insem dana inrem lohna a chhuah avangin thla thum lai kharkhip puan a ni a, hetih hun chhung hian police-in curfew puangin zin veivah pawh khap a ni bawk.
August thla khan online-ah mipa pathum thi thlalak a darh chiam atangin tharum thawhna thleng hi khawvel puma hriat a hlawh phah bawk.
Governor Peter Ipatas chuan tun tum inlambunna a thlen hma pawh hian indona a chhuak leh hnai nia ngaih theih tur thil a awm thu ABC hnenah hian a sawi.
Tun hnaia an buainaah hian hnam hrang hrang 17 zet an inhnamhnawih a, venhim hna thawktuten muanna a awm theih nan venhimna khauh takin an kalpui tih a sawi bawk.
“Province thuneitute atanga indona chhuak thei hnai kan hriat avangin kar hmasa atang khan venhim hna thawktuten inringin che nghal phat thei tur leh a thlen lohna tura che tura dah an ni,” a ti.
PNG-ah hian venhimna hi thil khirh tak a ni a. Thla hmasa maiah pawh khan buaina chhuak leh inrawkna thleng leh a hnua buai zelnaah mi 15 an thih hnuah emergency a puan a ngai hial a ni.
Anmahni nena intlawhpawh hnai ber, Australia chuan inthahna a thleng tih an hriat rualin ‘thil buaithlak tak’ a nih thu a sawi nghal.
“A tul angin puihna kan pe ang a, a bikin police officer-te training pek leh Papua New Guinea himna turin hma kan lakpui ang,” tiin Prime Minister Anthony Albanese chuan Thawhtannia radio-a an kawmnaah a sawi a ni.