Sorkar laipui hnuaia awm, Assam University, Silchar-a zirtirtu leh zirtirtu ni lo (teacher leh non-teaching staff)-te chuan Pulwama district, Jammu & Kashmir-a CRPF sipai thah takte tan an ni khat hlawh theuh thawhkhawmin an hlan dawn.
Vice-chancellor Ranju Rani Dhamala-a kaihhruaia sipai thite sunna hun an hmanah an tana thilpek hlan an ni khat hlawh theuh pek tur hian thutlukna an siam tih AU registrar Sanjeev Bhattacharjee chuan a sawi a. AU hian ram tana nunna hlan sipaite phuba lak nana firfiakte chhut chimih kawnga hmalakna chu an thlawp tlat zel dawn tih a sawi bawk.
Hetih lai hian Silchar veka hmunpui nei, cultural organisation pakhat, ‘Verse-pe-verse’ an tih pawhin sipai thite tan hian an theih ang anga pawisa thawh khawmin hlan an tum tih an puang bawk.
He pawl hian ‘Karwaan 3.0’ an chhuah tura kalkhawmte luh man an khawn chhuah (gate revenue) chu a bo abang awm lovin National Defence Fund-ah sipaite tan an hlan vek dawn tih an sawi a. Karwaan hi open mic event lar tak niin 3rd edition hi February 22 hian Silchar-ah ‘Verse-pe-verse’ hian an chhuah dawn tih an pawl dintu, Hrijoy Das Kanungo leh tuna an president Jnanendra Das te chuan an sawi.
Barak Valley-ah hian nimin khan Pulwama-a sipai thite sun nan leh firfiaka chetna an duh lohzia lantir nen dawr, sumdawnna hmun zawng zawng an khar vek bawk.