Mizoram Larsap Dr Hari Babu Kambhampati chuan a kaihhruai sorkar chuan sorkar chak, langtlang leh rinawm, harsatnate sukiang tura rang taka hma la thin leh mawhphurhna la ngam sorkar rinawm nih an tum thu a sawi.
Thawhtannia budget session tan ruala thuchah a sawiah larsap chuan ei leh bara intodelhna te, hmasawnna ruhrel pawimawh tak tak din te, agriculture leh thil siam chhuah lamah hmasawnna nasa zawk thlen te, thalaite thiam thil tihhmasawn kawngah te leh infiamna lama sorkarin tan lak a tum thu a sawi.
Nikum kum tawpa mipui thawhhona leh tawiawmna zarah MLA inthlanpui hlawhtling tak neih a nih thu a sawi a. “Sorkar inrelbawl danah te, a ngaih pawimawh leh thil tumah te danglamna hmuh mipuiin an beisei tih a lang a. Chu an beiseinate chu tihhlawhtlin ngei a nih theih nan sorkar chuan theihtawp a chhuah dawn tih ka tiam e,” a ti.
Larsap chuan tun dinhmunah chuan sum harsatna karah economy hmasawnna tur atan hma lak thuai thuai a harsat thu a sawi a. Chhiah atanga sum lakluh a la tam tawk loh bakah expenditure sang zel avangin sum puk zat a tam lo thei lo a; chumi karah sorkar laipui atanga sum hmuh (Post Devolution Revenue Deficit Grants) a tlem tial tial a, private sector atanga investment hmuh a tam bawk si lo a. Heng avang hian leiba leh sum indaih lohna an neih phah tih sawiin, ngaihtuahna thar nen hma thar an la dawn tih a sawi.
Sum leh pai dinhmun siam tha tur chuan kawng hrang hranga hmalak an mamawh tih sawiin, “Heng zingah hian thil dang dangte bakah sorkar sum fir taka hman te, awmze nei taka sum hman te, inrenchemna kalpui te, sumpai, tha leh hmanraw neih angte awmze nei leh hmangchang hre taka hman te pawh a huam tel tur a ni. Mahse, heng hmalakna zawng zawngte hian zan khat thil thuah kan economy-ah inthlak danglamna a thlen thei lo va, kan sum dinhmun pawh a ti tha thei lo tih hi kan hriat reng a ngai a ni,” a ti.
Dr Kambhampati chuan kuthnathawktute hmakhua ngaia an thlai tharchhuah te hralhna tur ruahmanna tha zawk siam chu ngaihpawimawh a nih tur thu a sawi a. Horticulture, fisheries, veterinary & animal husbandry leh sericulture te pawh eizawnna hnar pawimawh tak an nih angin ngaihpawimawh an nih tur thu a sawi bawk.
Kumin hian sorkar chuan policy thar Hand Holding Policy ‘Bana Kaih’ an kalpui dawn tih sawiin larsap chuan, “He policy thar hian tun hmaa thil pawimawh tak ni thin, agriculture leh industry tenau zawka theihtawp chhuaha hma la thinte tan institutional credit, a bik takin microcredit awm theih dan tur chungchang a ngaihtuah dawn a ni,” tiin, he policy hi sorkar laipui hnuaia programme, scheme leh hmalakna hrang hrangte nena inmil leh rualkhai taka kalkawp tir an tum thu a sawi bawk.
Mizoram sorkar hian state chhunga hmasawnna ruhrel tihhmasawn, sak leh enkawl a tulzia a hria tih sawiin larsap chuan, “Chung zingah chuan inkalpawhna kawngpui tha siam chu ngaihpawimawh hmasaka neih a ni. Kan state ang tlangram state-ah hian inkalpawhna kawngpui hmanga inthlunzawmna siam leh tihchangtlun chu hna hautak tak a ni. Sorkar chuan kawngpui tha leh tlo siam bakah thenawm state-te nena inkalpawhna kawngpui tha siam turin theihtawp tak meuh a chhuah dawn a ni,” a ti a ni.