- Ruata
Tun tumah chuan SUV huang hralh kal leh mite duh em em sub-4 meter SUV huanga lirthei kan hmuh hnaih tur hrang hrang kan han tarlang ang a, heng SUV thar tur te hi company hrang hrang atangin a ni a, a then a thar hlak a nih laiin a tam zawk chu a chhuak mek tuai thar te a ni thung dawn a ni.
He huangah hian kan lirthei hriat lar hrang hrangte chu Tata Nexon, Hyundai Venue, Maruti Suzuki Brezza, Kia Sonet, Mahindra XUV300 leh adangte a ni mek a. Heng lirtheite hi chu hmelhriat lo mang pawh kan awm a rinawm loh a. SUV-ah chuan hralh kal leh Mizoram chhung ngeiah pawh kan hmuh tam em em leh lirthei leitute lei tam em em a ni.
Tunah hian he huangah hian a hralh kal zual pahnih chu Tata Nexon leh Maruti Suzuki Brezza hi a ni a. Hetihrual hian a dang pawh hi Mizoramah phei chuan hralh an kal zawk hlei hlei emaw tih tur a ni a. Kan han sawi hmasak hi chu India ram pum huapin a ni a, Mizoramah chuan tunhnaiah Hyundai leh Kia te sub 4 meter SUV te hi hralh an kal em em a ni.
Tunah chuan tunhnaia rawn chhuak thar tur te hi tawi te tein han thailang dawn ila.
- MAHINDRA XUV300 FACELIFT
Mahindra chuan an sub-4 meter SUV changkang leh mawi tak mai XUV300 chu a thar, hmel thar nen facelift model rawn tihchhuah an tum a, hei hi 2024 Mahindra XUV300 tih te pawhin a sawi theih awm e. Tuna an rawn tihchhuah tur hi chu a chhuak mek tlemtea khawih thar deuh hlek chauh ang kha a nih hmel loh a, a landanah pawh danglamna tam tak kan hmu hmel a, a nghahhlelhawm tawh viau a ni. A chhunglama a kentel hrang hrang pawh changkang leh tunlai ber ber a ni tawh dawn a, sub 4 meter SUV huanga eng lirthei mahin an la neih ngai loh, panoramic sunroof chu rawn dah an tum bawk a ni.
Tuna a khawl neih mek 1.5-litre diesel, 1.2-litre turbo petrol leh 1.2-litre direct injection turbo petrol (TGDI) te a la hman zel hmel a. A khawl chak ber tur, 131bhp, 1.2-litre turbo petrol engine hmangah hian automatic transmission tha mi, Aisin-sourced 6-speed torque converter automatic gearbox chu duhthlan turin a awm dawn bawk a ni.
- NEW SKODA COMPACT SUV
Skoda hian sub-4 meter SUV thar hlak tihchhuah ve an tum mek bawk a. Skoda hi Mizoramah chuan a lar lo viau naa an lirthei erawh hi chu hmuh tur a awm ve pheuh pheuh a. Skoda sub-4 meter SUV tur erawh hi chu tunhnai tut tuta chhuak lo tur a ni thung dawn a, kum 2025 kumtir lamah kan hmuh theih hmel a ni. MQB AO IN platform – Slavia, VW Taigun leh Virtus te pawhin an hman ang, tlema khawih danglam deuh nghahchhanin he SUV thar tur duan a nih hmel a. He SUV thar tur hian 1.0-litre, 3-cylinder turbo petrol engine, manual leh torque converter automatic gearbox duhthlan tur awm a hman hmel bawk a. He SUV hian thil hrang hrangah Slavia sedan in a neih hrang hrangte a rawn tawm dawn a ni.
- NISSAN MAGNITE FACELIFT
Nissan Magnite sub-4 meter SUV hi India rama ama huangah chuan SUV tlawm pawl a ni a. Hetihrual hian a siamphung a mawiin a changkang em em a. Kumin chhung hian hmel thar nen an rawn tuai thar hmel a ni. Design lamah thil thar kan hmuh nual hmel a, hei bakah hian touchscreen infotainment system lian zawk leh digital instrument console thar te kan hmu dawn a. He SUV hian a khawl hman mek lai, 1.0-litre petrol leh 1.0-litre turbo petrol te a la hman chhunzawm zel hmel bawk a ni.
- NEW RENAULT KIGER
Renault chuan new-gen Kwid, Kiger leh Triber an tichhuak dawn tih tunhnaiah an puang a. Renault SUV mawi leh man to lo tak Kiger thar tur hi kuminah chuan an tlangzarh hman lo deuh rin a ni a, nakum kumtawp emaw, kum 2026 law lawah pawh an tlangzarh beisei a ni a. A design-ah hian danglamna lian tak kan hmuh hmel a, hei bakah hian a kentelah pawh thil thar tam tak kan hmu dawn a. A khawl hman mek lai, 1.0-litre petrol leh 1.0-litre turbo petrol te a la hman chhunzawm zel hmel bawk a ni.
- NEW HONDA COMPACT SUV
Tuna Honda in SUV thar an tihchhuah Elevate chuan mipuite a hip hle mai. Elevate a chet that chhoh avang te pawh hi a ni thei ang a, Honda chuan sub-4 meter SUV thar hlak tichhuak turin ruahmanna an siam leh ta a ni. Hetihrual hian an sub-4 meter SUV, WR-V new generation model a nih ring te pawh media hrang hrangah an awm bawk a, hei hi Indonesia-a hralhchhuah lai mek a ni. He SUV lo chhuak turah hian 1.2L petrol leh 1.5L petrol te duhthlan tur a awm hmel a. Company atang te pawhin chanchinthar kan hriat chhoh zel a beiseiawm a ni.