Mizoram State Day pual hian State Day of Prayer Committee huaihawtin Mizoram district hrang hrangah ram pum huapa sual ngaihdam dila chawnghei tawngtai beihpui thlak a ni dawn a. Chief Minister Lalduhoma’n he tawngtai beihpui thlakah tel vek turin mipui a sawm.
Mipui sawmna thuchah a tihchhuahah Chief minister Lalduhoma chuan, “Mizo ram leh hnam a dinchhuahna tur chu lei leh vana thuneihna sang ber kawltu Pathian kutah chauh a awm avangin, ram pum huapa a hmaa an kutza chu a tul a. State Day pual hian chawhmaa Vana pa hall-a hun hman zawhah, chawhnu dar 1 atangin Lammualah hun hman chhunzawm a ni dawn a ni,” tiin, Mizoram chu a lo dam a, thlarau thianghlim hnathawh thar a lo thlen theihnan tel tawngtai beihpui thlaknaah hian mi zawng zawng tel turin a sawm.
State Day of Prayer Committee chuan sual ngaihdam dila tawngtai beihpui thlakna hmun tur Lammuala kal turte chu mahni remchan dan ang anga pankhawm turin mipui an sawm a. He huna saiip puan sin duhte tan Vaivakawn, Chanmari leh Sikulpuikawnah te chhawp a nih dawn bakah, Lammual gate-ah lak theih turin ruahmanna a siam a ni.
Mizoram district tinah State Day of Prayer (S.D.P.) huaihawt a ni dawn a, district headquarters-a kal remchang loten mahni khuaah thahnemngai taka insawm khawmin, he Zoram pum huap tawngtai beihpui hi lo nei ve turin a ngen bawk.