India-a airline lawk tak tak thenkhat hnenah sorkarin an thlawhna khawl tihthih a nih atanga minute 10 chhunga an mi phurh (passenger)-te hnenah an bungrua pe hman turin a hriattir.
Civil aviation ministry chuan passenger-te bungrua hi an tum atanga minute 10 atanga 30 inkarah chuan a neitute kuta thlentir hman ngei turin a ti a ni.
Airline-te hian hemi chungchangah hian sawi duh an nei a nih chuan February 26 thleng hun an pe bawk.
India-a thlawhna tumhmun hrang hrangah hian passenger-ten an bungrua an nghak rei thei lutuk chu buaina a tling.
Bureau of Civil Aviation Security (BCAS) chuan airline lian pasarih hnenah a hun takah an mi phurhna bungrua pe tura hriattirna hi a pe a; heng zingah hian Air India, Vistara leh IndiGo te pawh an tel.
Aviation ministry hian India rama thlawhna tumhmun lian parukah passenger-ten an tum hnuah an bungrua an hmuh theih nan engtia rei nge hun an hman tih a thlithlai hnuah hriattirna hi a chhuah a. Heng an thlithlainaah hian airline pasarih thlirin thlawhna lut leh chhuak 3,600 zet an vil a ni.
Ministry-in thuchhuah a siamah chuan January atang khan kal dan ennawn hi tih tan a nih thu leh an la kalpui zel tih a sawi.
Airline tinin an mi phurhte hnena an bungrua an pek theih hun chhung hi a rang ve hret hret tawh a, inkaihhruaina ang erawh a la phak rih lo deuh tih a sawi bawk.
Kalpui danah chuan thlawhna a tuma a khawl tihthih a nih chiah atanga chhiara ‘minute 10 chhungin a hmasa berin a dawng hman tur a ni a, a hnuhnung ber chuan minute 30-ah tal a dawng tur a ni’ tih a ni.
India-ah hian thlawhnaa chuang tam tak hian an tum hnuah an bungrua an nghak rei thei lutuk chu kawng hrang hrangin a buaithlak an tih thu an lo au chhuahpui tawh thin.
A chuang phei chuan darkar khat dawn nghah ngaih changte pawh a awm a, baggage belt-ah thil fel tawk lo a awm phei chuan a aia rei pawh an nghah ngaih chang a awm fo thin bawk.
Thla tam vak lo kal ta atang khan aviation ministry hian kawng hrang hrangin thlawhnaa zinnaah hahdamna leh thil buaithlak a thlen lohna turin hma a la tan.
Kar hmasa khan India-a sumdawnna khawpui, Mumbai-a international airport-ah chuan thlawhna lut leh chhuak insulpel buai a awm loh nan leh tum hun chhung rei zawk a awm theih nan thlawhna thlawk a lo titlem tawh bawk.