Thawhtan chawhma dar 10:00 atang khan Khelo India University Games (KIUG) – Men’s football chu Rajiv Gandhi Stadium-ah khelh tan a ni a. Champion lai University of Punjab, Patiala chuan si hnih faiin an khingpui University of Calcutta an hneh a, point thum hmuin bul an tan. Thawhtanni a inkhel dangah University of Calicut in hnehna an chang bawk.
Group A-a inkhel hmasa berah champion lai University of Punjab in University of Calcutta an hmachhawn a, bul an tan tha hran lo. Chak tur zawk rin thiam har khawpin an innawr tawn reng a, hun tawp dawn hnaihah champion lai hi an vannei ta hlauh. Minute 73-naah free-kick atanga ball kal chu Mandeep Singh chuan hnaite atangin a pet goal a, hmahruaina goal a thun. Mandeep Singh goal hian champion lai afuih phur leh zual a, inrintawkna sang zawk nen an inlan zui theih phah.
University of Calcutta in an s phurh sut tumin tan an khawh nasa hle a, an hun tha neih an chhawr tangkai thei lo. Hun tawp dawn hnaihah an chesual a, goal an chhuah belh leh. University of Punjab in fuh zetin an nawr tlang a, minute 85-naah Jobanpreet Singh chuan awlsam takin a pet goal a, an goal hnihna a thun. Jobanpreet Singh goal thun hnu hian goal dang a luh belh tawh lova, champion lai University of Punjab, Patiala in hnehna an chang a, point thum an hmu.
Thawhtannia inkhel hnuhnung zawkah University of Calicut chuan an khingpui Guru Nanak Dev University chu 3-1 in an hneh a, point thum an hmu ve bawk.
University of Calicut tan hian Arshad PP chuan minute 30-naah hmahruaina goal a thun a, Shamsad KP leh Arjun MM ten goal khat ve ve an thun belh bawk. Guru Nanak Dev University goal neih chhun hi minute 90+2 a Bipul Kala thun a ni.
Vawiin chawhma dar 11:00 atangin KIUG men’s football khelh chhunzawm a ni dawn a. Mamahtma Gandhi University, Kottayam leh University of Kerala ten Group inkhel bul an tan ang a. Chawhnu dar 2:00 ah Adamas University leh Shivaji University te an inkhel zui ve leh ang.
Khelo India University Games vawi lina hi hmarchhak state parukin an inthlen tawm a. Inelna thlengtu pui ber Assam in inelna paruk an thleng a. State dang panga ten inelna pakhat theuh an thleng a, Mizoram ah Football inelna nghah a ni. Rambuai vangin Manipur chuan inelna a thleng thei lo thung. Thawhtanni a khelh tan KIUG football hi February 27, Thawhleh chawhnuah final khelin, a hmawr bawk a ni ang.