Congress chief hlui, Lok Sabha member ni mek, Sonia Gandhi chu Rajasthan-ah chuhtu awm lovin Rajya Sabha member atan thlan tlin a ni.
Kum 77 mi, Gandhi-i hi prime minister hlui, Manmohan Singh-a bial thin, Jaipur-ah hian ding turin thla tirah khan a hming a pe lut thut a ni.
Gandhi-i hi Lok Sabha-ah kum 2006 atangin Raebareli bialtu a lo ni tawh a. Kum 2019 inthlanah pawh khan Congress-in an hniam lai ber tawnga an chhungkaw thatna thin, Uttar Pradesh-a bial dang, Amethi-a Smriti Irani laka Rahul Gandhi-a ngei pawh a tlak laiin a la tling a ni.
Lok Sabha atanga Rajya Sabha-a Gandhi-i a insawn ta thut hi thenkhat chuan a fanu tan a bial a kian nia an ngaih laiin BJP chuan inthlanpui lo awm leh tura a tla dawn tih a hmuh lawk vangah an puhsak ve thung.
“Amethi-ah Congress an chak loh chian hle hnuah a dawt chu Rae Bareli a ni a. Sonia Gandhi-i pawhin Rajya Sabha lam panin hneh a ni dawn tih a inpawm lawk a ni. Gandhi-te hi an chaknaah pawh hnuchhawn an ni mek zel tawh a. Congress hi SP-in bial 11-ah ding turin bial pe mah se UP-agh an chak lo vek dawn,” tiin BJP hruaitu, Amit Malviya chuan X-ah a tar lang a ni.