Kar tawp inrinni leh pathianni zan khan Europe khawmuala tualchhung league lian zual panga khelh chhunzwm a ni a. Kar tawp football hnuhma thar eng emaw zat hnutchhiah thar a ni a. Europe top 5 league kan thlir kual thuak thuak ang a, Inrinni leh Pathianni bika football hnuhma langsar kan tarlang leh ang.
- English Premier League
Inrinni zan khan EPL club lian Manchester City leh Chelsea te chu Etihad Stadium-ah an inkhel a, 1-1 in an inhnehtawk. He inkhelah hian Raheem Sterling chuan a club hlui City lakah Chelsea hmahruaina goal a thun. Sterling hian Stamford Bridge-a City an mikhual tumin goal a lo thun tawh bawk a. City lakah home leh away-ah goal a thun ve ve. EPL season khatah City laka hetiang ti thei hmasa ber a ni.
Inrinni zan hian EPL hmahruaitu Liverpool chuan mikhual an nihna Gtech Community Stadium-ah 4-1 in Brentford an hneh. Reds tan hian bench atanga lut pahnih; (Mohamed Salah leh Cody Gakpo ten goal an thun ve ve a, assist an nei ve ve bawk. Kum 2018 hnu lamah bench atanga lut pahnih goal thun bakah assist nei kawp leh thei hmasa ber a ni.
Aigupta tlangval Salah hian EPL season kal mekah goal 15 a thun tling tawh a, hei hi EPL-ah season sarih chhung ngawt goal 15 chin a thun tlinna niin, Arsenal forward ropui Thiery Henry a tluk chiah a. EPL-ah season tina goal 15 chin thun zawn tam lamah palina a ni chiah bawk.
Pathianni zan khan Brighton chuan table mawngphaha awm Sheffield United chu an khelmualah ngei 5-0 in an sawp. Hei hi Brighton in EPL-ah Mimuala hnehna an chan chian ber tum a ni a, club record thar an siam.
Manchester United tan kum 21 leh ni 14-a upa Rasmus Hojlund a vul zual zel. Hojlund hian Pathianni zana Luton Town an hneh tumin goal hnih a thun a, hei hi EPL a khelh hnuhnung vawi rukah goal a thun vawi rukna chiah a ni bawk. Manchester United tan EPL a khelh li chhung goal thun zawn thei naupang ber a lo ni tawh a. Tunah chuan EPL chanchinah khelh ruk chhung goal thun zawn thei a ni der tawh a. Kum 21 leh ni 272 upa ni chunga Joe Willock record siam chu ni 258 zet in a khum.
Rasmus Højlund hian Luton Town laka hmahruaina goal a thun hi inkhel tan atanga second 37-na lekah a ni a, EPL-a goal thun rang ber record a siam. United hian minute 7 chhung lekin si hnih faiin hma an hruai hman bawk a, hei pawh hi EPL-ah minute 7 chhunga si hniha hmahruai thei record thar a ni bawk.
- Spanish LaLiga
Inrinni zan khan Atletico Madrid chuan 5-0 ngawtin an mikhual Real Sociedad an sawp. Atletico Madrid hian kum 2005 hnu lamah Sociedad lakah hian chawlhlawk hmaa goal khat aia tama hma an hruainaah tlawm an la nei lo.
Pathianni zanah Rayo Vallecano nen 1-1 a an inhnehtawk tumin Joselu chuan minute 3-na lekah Real Madrid hmahruaina goal a thun. Kum 33 mi La Liga season kal mekah goal 8 a thun tling tawh a, 2019-20 hnu lamah Real tan goal 8 thun thei upa ber niin Benzema chungah a leng. Kum 2019-20 season khan Sergio Ramos chuan goal 11 a thun a, he record hi Joselu hian khum theihna hun tha a la nei.
Pathianni zan khan team talbuai Almeria chu Granada nen 1-1 in an inhnehtawk a, an chak zo lo leh pek. Almeria hi La Liga an khel hnuhnung vawi 28-ah chak an nei tawh lova, draw vawi 10 an neih bakah tlawm zawkah vawi 18 zet an tang a. Hei hi La Liga-ah chak nei lo rei ber record thar a ni hial.
Robert Lewandowski chuan hun tawp dawn tep minute 96 leh second 49-naah Barcelona chakna goal a thun a. Kum 2010-11 hnu lamah Barca chakna goal thun tlai ber a ni.
- Italian Serie A
Pathianni zan khan Monza chuan an mikhual AC Milan chu 4-2 ngawtin an hneh. Hei hi Serie A-ah goal li an thun hmasak ber a ni a. Milan nen an intum tawh vawi sarihah point an la hmu ngai miah lova, Pathianni zan khan a vawi khat nan point thum an hmu ve ta nawlh.
Kum 2024 bikah Juventus forward Dusan Vlahovic a chetha hle a, game ruk atangin goal sarih a thun der tawh. Juventus tan kum thar tir game ruk atanga goal 7 thun thei pahnihna a ni a. A chungah hian game ruk atanga goal 10 thun tu Cristiano Ronaldo a awm.
Inter Milan tan Lautaro Martínez a chetha chhunzawm zel a, 4-0 a Salernitana an hneh tumin goal khat a thun. Martinez hian Inter Milan tan goal 125 a thun tling chiah a, Mauro Icardi lehpelin Argentinian zingah Inter Milan tana goal thun tam ber a ni.
Sassuolo player Andrea Consigli chuan Serie A-ah vawi 497 a khel tling chiah a. Serie A khel hnem 17-na a ni.
- German Bundesliga
Bayern Munich chetha lo mah se mimal takin Harry Kane a chetha a, goal a thun chhunzawm zel. Kane hian Bundesliga-a a season khatnaah goal 25 a thun tling der tawh. Kane hi season kal mekah Europe’s Top 5 league-a goal thun hnem ber a ni mek.
Champion lai Bayern hi tunlaiin an khel chhe zawn a, an khelh hnuhnung pathumah an tlawm vek. Hei hi kum 2015 hnu lamah vawi thum an tlawm zawn lehna hmasa ber a ni.
- Ronaldo & Messi
Cristiano Ronaldo chuan Al Fateh an hmachhawn tumin goal a thun a, inelna hrang hrangah khelh ruk chhung goal thun zawn tawh in, hei hi Al Nassr a zawm, January 2023 hnu lamah goal a thun zawn rei ber a ni.
Lionel Messi chuan Inter Miami a chet ropui pui hleithei meuh lo va, an khelh hnuhnung vawi 15-ah vawi khat chiah an chak.