US defence firm Lockheed Martin chuan nimin khan indo thlawhna thar, kawng hrang hranga hman theih tur, F-21 an tih chuan tlangzarh a, he thlawhna hi India-in a leisak tur nia sawi a ni a, India-ah pawh siam tur nia sawi a ni bawk.
Company hian dollar tam tak hu India atangin order an dawng a, Request For Information (RFI) an tih inremna hmangin fighter aircraft hi India chuan 114 a leisak dawn a ni.
Company chuan an indo thlawhna chhawp chhuah thar hi Indian Air Force (IAF) hman tur bika dun a nih thu leh sorkar laipuiin ‘Make in India’ a kalpui angin India ram chhunga siam chhuah tur a ni.
India-a pho chhuah leh India-a siam tur tih hi Bengaluru-a Aero India show-ah phuan a ni a, Tata Advanced Systems nen thawk dunin Lockheed hian F-21 hi India ram chhungah ngei an siam dawn a ni.
Lockheed hi IAF-in RFI a zawrh chhuah zinga chhangtu pasarih zinga firm pakhat a ni a. A tirah chuan India hnenah hian F-16 indo thlawhna an zawrh a; mahse, IAF hian an mamawhna mil tur leh an mamawh khawp awmna, F-21 an tih hi an duh zawk a ni.
Lockheed chuan F-21 thlawhna hi a danglam bik hle tih an sawi a. A changkang a, IAF mamawh kimna leh ram chhunga industry pawhin an siam ve mai theih niin an sawi.
IAF chuan thlawhna thar chungchangah hian sawi an la nei lo va. US firm hian F-16 Block 70 chu MMRCA (medium multi-role combat aircraft) deal hnuaiah an zawrh bawk a; mahse, India hian Dassault siam Rafale a lei dawn a ni.