MSL 9 khelh mekah champion tura rinkai Zarkawt BCA an khel tha tluang a, thawhtan zana an chakna hmangin hma an hruai chhunzawm. Thawhtan zana inkhel dangah Chanmari Vikings chuan Bungkawn LB Associates an hneh bawk.
Vawi thum chak zawn tawh Zarkawt BCA hian thawhtan zana an khingpui Mission Veng Hotshots lakah bul an tan tha hran lova, quarter hmasa pahnihah hnufual zawk an ni ve ve. Quarter khatnaah point 20 chauh an thawkchhuak a, point 8 in hnufual zawkah an tang. Quarter hnihnaah an khel chhe leh zual a, point kuain an hnufual zui leh a. Point 17 zeta hnufual chungin chawlhlawk an hmang.
Table-a hmahruai mektu BCA in chawlhlawk an hmang tangkai a, chawlhlawk hnu lamah team thar hlak ang maiin an inlan. A khingpuite lehthal ngei tuma tan khawh BCA hi quarter thumnaah point 19 zetin an chungnung a, point hnihin hma an hruai let nghal der. Inkhel a rei a, BCA an khel tha telh telh. Quarter thumnaah point 19 zeta an chungnung hnuin quarter hnuhnung berah point 15 zetin an chungnung zui leh ta mai a. An khingpuite hi point 17 ngawtin an lehthal a, point 98-81 in hnehna an chang a, a vawi li nan an chak zawn.
Mission Veng Hotshots an hneh tum hian Zarkawt BCA tan Emmanuel Malou chuan point 29 a thawkchhuak a. Lalnunpuia Renthlei in point 27 a thawhchhuah bakah Lalrina Renthlei chuan point 21 a thawkchhuak bawk. Season liam taah uiawm taka champion zo ta lo Zarkawt BCA hian season tharah vawi li khelin an la chak vek a, hma an hruai chhunzawm zel.
Thawhtan zana inkhel dangah Chanmari Vikings leh Bungkawn LB Assosciate ten inkhel hmuhnawm an lantir a, inkhel inbuktawk takah Chanmari Vikings chuan point hnihin hnehna an chang thei hram.
Vikings hian Bungkawn LB A lakah bul an tan tha lo hle a, quarter tawp berah point 5-a an chungnun vangin harsa takin hnehna an chang a. An khingpuite hi point 84-82 in an hneh.