Russian President Vladimir Putin-a chuan North Korean hruaitu, Kim Jong Un-a hnenah Russian siam car man to leh changkang a pe.
Pyongyang sorkar chanchinbu chuan limousine hi Pathianni khan Kim-a thawhpui lawk tak hnena hlan a nih thu a puang.
Kremlin thupuangtu, Dmitry Peskov pawhin a hnuah thilpek inpek a nih thu hi puang vein Aurus hi Putin-a pawhin a hman ang chi, full-sized luxury sedan a nih thu a sawi.
Ram dang tam zawkin an kawmserh ram pahnihte hi Russia-in Ukraine a rûn hnu atangin an inkawmngeih zual hle.
Ram pahnihte hi khawvelin hrek mah se North Korea hian Russia hnenah hian indonaa hman tur laipui, rocket leh ballistic missile a pe nia ngaih a ni a. An pahnih erawh hi chuan hrekna hi engmah palzut an nei lo niina n sawi ve ve thung.
Putin-a hian September thla khan Kim-a hi Russian Far East-a Vostochny Cosmodrome-ah a lo mikhual tawh bawk a, hei hi North Korean hruaituin kum li hnua ram dang a tlawh leh hmasak ber a ni.
Hemi tum hian North Korean hruaitu hian Putin-a Aurus Senat limousine hi en velin a chuang chhin bawk a. Silai pawh an inpe tawn bawk.
Kim Jong-un-a hi car lawm tak nia hriat a ni a, ram dang siam lirthei man to tak tak a la khawm nasa hle.
North Korean sorkar news agency KCNA chuan Kim-a farnu, Yo Jong-i pawhin ‘thilpek hian ram pahniha hruaitu lu berte mi mal taka an inkawmngeihzia lantirna chiang tak’ a nih thu a sawi niin a tar lang.
Hetih lai hian South Korea Foreign Ministry chuan he thilpek inpek hian UN Security Council-in North Korea a hrek mekna a bawhchhia niin a sawi a, lirthei lam chi, car changkang pawh an la lut thei lo niin a sawi.
Russia leh North Korea ramte hian Putin-a pawhin Pyongyang a tlawh hnai niin an sawi ve ve.