Aizawl: Nimin chawhnu khan Durbar Hall, Raj Bhavan-ah ‘Ek Bharat Shreshtha Bharat’ hmalakna hnuaiah Mizoram Governor Dr. Hari Babu Kambhampati chuan Mizoram leh Arunachal Pradesh State-te pualin Foundation Day lawmna hun a buatsaih.
He hunah hian governor chuan kum 37 kaltaah Mizoram leh Arunachal Pradesh-te chu India ram state 23-na leh 24-na atana puan a nih thu sawiin, foundation day lawm tura state pahnih aiawha kalkhawmte Raj Bhavan-ah a lo lawm thu a sawi a. Kum 20 dawn rambuai a nih hnuah June 30, 1986-a sorkar laipui leh MNF ten inremna thuthlung Peace Accord an ziak a, hemi hnu February 20, 1987-ah Mizoram chu state puitlinga hlan kai a ni, a ti a. “State a nih hmain harsatna hrang hrang tawk bawk ma hse tuna pawimawh ber chu India ram state zinga ralmuang ber a ni thei hi a ni,” a ti bawk.
Ek Bharat Shreshtha Bharat programme hian India rama state leh UT hrang hranga cheng hnam hrang hrang, hnam ziarang leh nunphung inang lo tak takte inkara inpawhna tha zawk siam leh an inkara inhriatthiam tawnna nasa zawk siam a tum a ni.