Mihring hian midang hmin tuma thu kan sawinaah hian mi va hmin kan tum luatah kan thusawi ti awihawm turin thu dik lo deuh sawi belh kan ching fo thin. Kan thil sawi chu an pawm ngei theih nana uar pawh kan ni thin. Uar taka han sawi hian mi tam tak chuan an lo pawm phah ta thin a ni. A sawitu lahin miin a thusawi an pawm khan hlawkna a hmuh dawn phawt chuan thudik piah lam a sawi ta thin a. Mahse, kan thusawite chu a tak ram thleng thei lo anih chuan dawt sawi kan ni leh mai a. Thu uar lutukte hi dawtsawi hmang nihna a ni a. Tihhlawhtlin beisei a, tih theih dawna kan hriatte pawh hi chiang lutuk anga sawi hi a him lo fo. Khawvelah hian kan ngaihtuahna leh duhthusam hi a thleng dik vek silo. Dawt sawi leh thil thleng dik lo tur sawi lawk vak vak hi midang tana kan rinawm lohna pholangtu ani fo.
Kan ram politiciante kan rin lohna chhan tam tak hi uar lutuka an duhzawng leh thil awmdan tur an sawi thin dik leh ta silo vang ani ber. Kan chief minister kalchhuak ta pawh kha a thil sawi a uar thei lutuk a. Mi tam tak phei chuan a thusawi dik leh thalai pawh ngaichang tawh lovin nuihzat lam chanin an chang hman hial a ni. Ram hrauitu ber khatiang anih avang khan a kaihhruai party tan mipui rin hlawh theih ani tawh lova. Chiang taka maia rorelna thutthleng atanga mipuiin na paih chhan kha thudik chiah lo leh uar lutuka chutiang sawi a chin vang lha a ni.
Tuna kan chief minister thar pawh hi thusawi thiam em em mai a ni a. A CM dawn tan chauh a la ni a. Mipuiin a thusawi pawh an ngaichang viau rih a. Mahse, a thusawi a thlen dik loh a, sawi pialna a zawng fo anih chuan eng ang pawhin sawi thiam mahse mipui a hmin rei lovang. Mipuite hi kan changkang tawh a. Thudik chin leh dawt te, an thusawia thil thleng thei chin leh chin lo hi kan thliar thiam vek tawh a. Sawi uar avanga in hmin tum hun lai kha kan kalpel tawh a. Vawiin ni a thalaite bik phei hi chu dawt leh a behbawm a hruai hleih theih an ni tawh meuh lo. Engkim hi thu tak leh langtlanga kaihhruai an ngai tawh zawk a ni. Politics a lemchanna tualzawl mipuiin kan chhuahsan tawh laia lemchang hi chuan mi nuihzat bak an beisei thei lovang.