Mizoram state puitlinga hlan kai a nih champha vawi 37-na chu nimin khan Mizoram sorkar buatsaihin uar taka lawm a ni.
Aizawlah chuan Vanapa Hall-ah State Day lawmna inkhawm hi neih niin khuallian, Larsap Dr Hari Babu Kambhampati chuan Mizoram chuan hun rei tak buaina tuar mah se, remna leh muanna thuthlung ziah a nih hnuaah kum 37 lai chu India ramah state ralmuang ber a ni mek tih a sawi a, remna leh muanna hi kawng tinrenga hmasawn turin a pawimawh hmasa ber tih te, a dawtah sawrkar ngelnghet a pawimawh tih te, heng thilte hi Mizoramin a nei ve ve a, hruaitu tharte pawhin theihtawp chhuah an tum nen Mizoram tan beiseina êng a awm mek tih a sawi.
Khualzahawm, Chief Minister Lalduhoma chuan Mizoramin state a neih theihna kawnga hruaitu hmasate hmalaknate a sawi a, Article 371-G siam a lo nih dan te, he dan danglam bikna leh a nih phung te sawiin, chu dan chu Mizoram thil neih hlu ber leh a himna kulhpui a nih thu a sawi.
Chief minister chuan Mizoram state a nih hmain state dangte chuan kawng tinrengah hmasawnna rahbi an lo tuk tawh a, hmasawnna ruhrel tha tak takte an lo din tawh tih a sawi a, Mizoram erawh mi dangte hnua kal tan ve chauh a nih avangin kalmuan a thiang tawh lo tih te, mi dangte umphak tur chuan mi dangte kal aia kal chak a ngai a, mi dangte aia thawh tam leh thawhrim a ngai zawk tih a sawi a, “Kan ram kal zelna turah leh kan vision te tihlawhtlin kan tumnaah ke pen sual thiang kan ni tawh lo va, pen khat kal sual pawh a theih tawh loh,” a ti.
Thusawitu dang, NGO Coordination Committee Chairman Lalhmachhuana pawhin thu sawiin Mizoram chu state puitling kum 37 zet a nih takah chuan puitlinna kawngzawha ke a pen erawh a tul takzet tawh a, Zofate Jerusalem, Mizoram chu belhtlak ni turin a intodelh a ngai tih sawiin, ram ralmuanna tiderthawng thei ruihhlo te, dan loa sumdawnna te do let turin lungthu pathum, sorkar, kohhran leh NGO te kan tanrual a ngaih thu a sawi bawk.
Mizoram State Day lawmna inkhawm hi Chief Secretary Dr Renu Sharma chuan a kaihruai a, he hunah hian Under Secretary rank leh a chunglam officer te, NGO hruaitute leh sawm bik mi thenkhatte an tel a ni.
Vanapa Hall-a State Day puala hun hman a nih hnuah chawhnu dar 1 atangin AR Lammual-ah State Day of Prayer – Sual thuphachawi tawngtaina hun hman zui nghal a ni a. Chief minister bakah minister leh MLA eng emaw zatte pawh saiip puan sinin an tel.
State Day of Prayer-ah hian mipui tam takin saiip puan sinin sual thupha chawiin an tawngtai rual a ni.
State Day of Prayer hi Aizawl bakah district dang zawng zawngah pawh buatsaih a ni bawk.