- Ruata
Japanese lirthei siamtu lar, Mitsubishi Corporation chuan India ram an rawn lut leh dawn a, tunah hian ruahmanna hrang hrang la kalpui mek a ni.
Mitsubishi hming kan sawia kan rilrua lirthei lo lang thin chu Lancer tih te, Pajero tihte a ni a. A bik takin Pajero phei chu tunah pawh hian a chhuak hlui ho chu Mizoramah pawh tam tak hmuh tur a la awm a ni.
Mitsubishi hian India ramah kumin nipui laia rawn luh hman an tum a, tunah buaipui ngai te leh thil hrang hrang an ti mek niin a lang a ni. Mitsibishi hian India ramah hian TVS Mobility nena tangkawpin India ram hi an lo lut dawn a, TVS Mobility-ah hian share zaa 30 an lei a. TVS Mobility hi India rama dealership network lama hmahruaitu zinga mi niin tunah hian Honda car dealership pawh an enkawl mek a ni.
Nikkei Asia in an tarlan danin Mitsibishi in India ram an lo luhchilh turah hian dollar maktaduai 33 atanga 66 inkar lai mai investment an siam dawn a. Hetihrual hian a khuahkhirhtu lam atangin hei hi pawm a la ni lo a, tunah hian company pawhin an la ngaichang mek a ni. He investment zat tur hi pawm a nih veleh Mitsubishi chuan an hnathawktute pawh lo tirh luh nghal an tum bakah dealership hrang hrang atan ruahmanna neih chhoh nghal an tum a ni.
Mitsubishi hi an lo lut a nih chuan TVS Mobility kaltlangin anmahni pual showroom pawh an neih ve ngei a ngai dawn a. Hetihrual hian tunah rih chuan TVS Mobility hian Honda lirthei a tam thei ang ber hralhchhuah chu an hnapui ber a la ni rih a. Mitsubishi hian Japanese lirthei siamtu dang India rama awm mek te pawh an lirthei tihchhuah hrang hrang chungchang sawipuiin thutkhawm pui an tum bawk a ni.
Tunlaia lar leh lirthei company te hmalak mup mup na, India rama lirthei hrang hrang te hmalam atana pawimawh electric hmang lirthei lamah pawh Mitsubishi hian hma an la nghal dawn niin a lang a. Heng bakah hian smartphone application hmanga lirthei maintenance leh insurance buaipuina tur pawh rawn ruahman an tum a ni.
- India rama Mitsubishi hun hmasa
Mitsubishi hi India rama lirthei company hmingthang tak lo ni reng tawh a ni a. India ramah an mikhual hru dawn lo a ni. Kum 2016 khan India rama an hmalakna hrang hrang an lo titawp tawh a. Hetah hian CBU an thlan vang te, Hindustan Motors-a production lama an innghah lutuk vang te, lirthei tui heh zawng tih dik loh thuthang te leh sum lama harsatna avangin an chhuak a ni ber a. Mitsubishi hian kum 1998 daih tawh khan Ambassador car te pawh siamtu Hindustan Motors nena thawkhoin bul an lo tan tawh a. Lancer, Cedia, Pajero leh Outlander te an lo tichhuak thin a ni.
Company hlun leh hmingthangin India ram rawn luhchilh leh an tum hi thil ngaihnawm leh nghahhlelhawm tak a ni a. Reiloteah an car mawi tak tak leh offroad adventure lama tui te tan pawh an SUV tha tak tak te kan hmu chho leh dawn a ni a. An chanchin kimchang leh kal zel dan tur chu company lam atanga thuchhuak te lo ngaichang zel ila a tha awm e.