Thawhtan zana English Premier League inkhel awmchhunah champion lai Manchester City chuan si khat faiin Brentford an hneh a, Arsenal lehpel in, pahnihna an luah let leh. City tan hian tunhnaia goal thun harsat Erling Haaland chuan goal a thun.
Pahnihna luah let leh tura chak mamawh Manchester City hian 14-naa awm mek Brenford lakah an khel tha viau a, goal thun theihna hun tha pawh an nei zauh zauh. Etihad Stadium-ah khel tha viau mah se beisei angin goal an thun thei lawk lo thung a, goal thun turin an nghak rei hle. Inkhel tir lamah Brenrford pawhin goal thun theihna hun tha an nei a, club lian zawkte pawhin an hmutaih Ivan Toney a hlauhawm thin viau a, goal thun theihna hun tha a hlah a, a hun tha a chhawr tangkai thei bik lo.
Pep Guardiola team ten an hun tha neih an chhawr tangkai thei lo reng a, uiawm taka an hun tha an hlah reng hnuin minute 71-naah an hlawhtling ta nge nge. Minute 71-naah hian Julian Alvarez chuan Erling Haaland tan tha zetin ball a pe a, Haaland hian fuh taka a khalh tlang hnuin harsatna tawk lovin a pet goal a, hmahruaina goal a thun ta nge nge.
Haaland goal thun hnuin City an khel tha lehzual a, na taka an mikhualte nawrin goal thun theihna hun tha tam zawk an nei. Midfielder Bernardo Silva pet fuh zetin si nghak a pelh hnuin Brenford tlarhnungten an petchhuak hman hlauh a, team an chhanhim. Hun tawp dawn hnaih Haaland hian goal a thun belh leh a, he goal hi offside vangin hnawl a ni hlauh thung. Khel tha tluang tak Phil Foden pawhin goal thun theihna hun tha tak a hlah ve bawk a, City in goal dang an thun belh thei lo. Goal thun belh thei lo mah se City hian si khat faiin hnehna a chang a, point thum an hmu a, hmahruaitu Liverpool nen an inkar an tizim a, pahnihnaa an luah let leh bawk. Champion lai hian khelh 15 atangin point 56 an hmu a, hmahruaitu Liverpool nen an inkarah point khat a tlazep mek.
Brentford laka City chakna goal thuntu Erling Haaland khan EPL season kal mekah goal 17 a thun tling chiah a, topscorer a ni zui zel. Haaland hian Golden Boot dawn tuma a elpui lian Mohamed Salah chu goal hnihin a tlanpel mek. EPL-ah goal 17 a thun bakah hian inelna dangah goal 5 a thun tawh bawk. Hliamin tibuai bawk mah se a goal thun thiamna erawh a la theihngilh lo viau thung.