Maharashtra-a an thawhhona inkar a chhiat hnuah Chief Minister Uddhav Thackeray chuan nimin khan Prime Minister Narendra Modi chu New Delhi-ah a hmu a. Delhi-a a cham chhung hian Congress chief Sonia Gandhi, Home Minister Amit Shah leh BJP veteran LK Advani pawh a hmu ang.
Tun tuma Uddhav leh Modi inhmu hi Uddhav-an ngaihdan leh thurina a ngaihdan ang ni miah lo tangrual pahnih – Nationalist Congress Party leh Congress a thawhpui hnua an inhmuh hmasak ber a ni a. A thawhpui party pahnihte hnen hian tunah pawh ngaihdan inan lohna an nei mek a, National Population Register leh Citizenship Amendment Act chungchangah ngaihdan hrang daih an nei.
Shiv Sena hruaitu hlun, Sanjay Raut chuan Uddhav-an prime minister a hmu hi hetiang lam kaihhnawih a nih loh thu a sawi a, “Chief Minister Uddhav Thackeray chuan Modi a hmu dawn a, hei hi inkawmna pangngai a ni a, thil dang a awm lo,” tiin nimina an inkawm hma, zing lamah Twitter-ah a tar lang.
Shiv Sena hian BJP kalsana Congress leh NCP nena Maharashtra-ah thla rei lote kal taa sorkarna an siam hnuah tunah hian inngeih lohna an la nei lem lo va; mahse, NCP leh Congress hi CAA leh NPR duh lo an nih laiin Sena Chief Minister Uddhav hian tun hnaiah heng thil pahnih a thlawp thu hi a sawi ve thung.
“CAA leh NRC (National Register of Citizens) te hi thil hrang daih a ni a, NPR pawh a hrang daih a ni a. CAA hman a nih tak avang hian tu tan mah harsatna a awm lo vang,” a ti a. “NRC hi a la awm lo va, kan state-ah pawh hman a ni lo vang. Sorkar laipui pawhin NRC hi tunah chuan a la sawi lo,” a ti bawk.
Party pathum thawhho theihna tura hmalatu ber, Nationalist Congress chief Sharad Pawar chuan CAA leh NRC chungchang hi Uddhav-a party nen an sawiho dawn tih Thawhlehni khan a lo sawi ve tawh bawk a. “Sena hi kan hmin thei ang,” a ti.
Maharashtra sorkara tangho party-te inan lohna lian tak dang chu Elgar Parishad case a ni a, tunah chuan National Investigation Agency chhui tura pek a ni tawh a. Pawar hian thubuai hi NIA kuta hlan a nih ni pawhin minister-ten police officer-te a hmu tih a sawi.