Pakistan-a political party pahnihte chuan an ram inthlan chiri tak hnuah sorkar thar siam turin thawhhona tur thuthlung an siam fel thei ta.
Pakistan Muslim League-Nawaz (PMLN) chu Pakistan People’s Party (PPP)-in thlawpin sorkar an siam dawn tih an puang dun ta a ni.
Party pahnihte hian February 8 inthlanah khan prime minister hlui, lung ina tang mek, Imran Khan-a kaihhruai party-in an thlawp independent-a dingte aiin bial an la tlem zawk ve ve.
Khan-a kaihhruai, Pakistan Tehreek-e-Insaf (PTI) PTI party chuan thawhhona chu ‘rukru tura inthurualna’ tiin an sawi.
A kaihhruai party hian sorkarna an siam loh nan vote tihchingpen niin an sawi.
Chawlhkar khat zet thawkho tura a thuphunga inremna an neih hnuah PMLN leh PPP hian a tak takin an chantir ta tih Thawhlehnia thuthar lakhawmtute an kawmnaah a puang.
PPP Chairman Bilawal Bhutto Zardaro chuan, “Tangrualte hian ram eibar dinhmun buai mek hi chhanchhuah an tum dawn a ni,” a ti.
Prime minister hlui, PMLN President Shahbaz Sharif chuan ‘eibar leh thil danga chona awmte chu a huhovin an hmachhawn dawn’ tih a sawi bawk.
Inremnaah a siamah chuan Sharif-a hi a vawi hnih nan prime minister a ni ang a, PPP atangin Asif Ali Zardari chu tun hmaa a lo chelh tawh, president a ni ve thung ang.
Prime minister thlan hi parliamentary vote-a tih tur niin February thla tawpah tihfel hman a nih beisei a ni a. A hnuah president thlan zui a ni ang.
Tute nge chanvo pawimawh dang chelh dawn erawh hriat a la ni lo.
Thla tira parliament inthlanah khan result beisei loh tak a chhuak.
Khan-a hi lung inah dah niii an party-in inthlan chuh thei lo mah se independent-in an chuh hlawm a, mite beisei loh takin tling tam ber an ni.
National Assembly-ah member 93 an nei thei dawn a; mahse, sorkar tura member 169 erawh an tlin bik lo.
PMLN tan kawng a inhawng a, anni hi prime minister hlui tho, Nawaz Sharif-a kaihhruai niin PPP nen an indawr zui ta a ni.
PMLN hian bial 75 an la a, PPP-in bial 54 an la thung a. Party tenau deuhten an thlawp beisei a ni bawk a, hei bakah hian hmeichhia leh sakhaw zuitu tlem zawk tan seat hauh an chang thei dawn bawk.
Party pahnihte hian kum 2022 khan Khan-a hi an lo paih thla tawh a. January khan sorkar thil pawimawh tiputa puhin kum 10 zet lung in tang tura hrem a ni zui bawk.
PTI hian inthlan result chu court-ah an khing mek a, ram pumah lungawi lohna pawh an lantir.
Kar hmasa khan Jamaat-e-Islami party atanga tling, Hafiz Naeem ur Rehman chuan Karachi-a a bial chu kalsanin tual chhunga inthlan buaipuiten PTI an chak lohna turin thil an ruahman niin a sawi.
Inthlan kaihhnawiha lungawi lohna avang hian tun hnaiah social media pawh hman theih lohva tih a ni nasa hle a. Internet access monitoring group NetBlocks chuan Thawhlehniah pawh khan hmun tam takah X chu hman theih a la ni lo tih an sawi a ni.